Wezîrîya Zîret û Daristnan destûr dana seydwanîya heywanan. 21ê tebaxe de ''Sezonê Seydwanîye'' dîya destpêkerdene. Seba qirkerdişê 10 pezkovîyan zî herêmanê Koyanê Şeytanî û Gelîya Pêrî yê qezaya Gêxî yê Çewlîgî de 'kotayêke' ameye dîyarkerdene. Seba 8 seydwananê xerîban zî kotaya '10 xinziranê koyîyan' dîyaye. Rewşa winasêne Dêrsim de zî qewimîyena.

Aktîvîstanê xoza yê Çewlîgî ra Yunus Gurbeyî da zanayene ke qirkerdişê heywanan nêno qebulkerdene û venga Tirkîya da ke Peymana Pawitişê Xoza û Cuya Koyîye ya Ewropa (Peymana Bernî) bîyara ca. Gurbeyî vat: ''Tirkîya na peymane îmza kerda. Neslê pezkovîyan cara hê qedîyenê. Çewlîg de bi bahaneya ke 'xinzirê koyîyî zêdîyayî' destûrê seydwanîye dîya. Şaristan de seydwanê herêmî û seydwanê xerîbî gêrenê, heywanan kişenê. Kerdişê înan dûştê bawerî û xozaya ma yo. Ma hînî nêeşkenê seydwanan teqîb bikerê. Çunke ê zî xo ma ra nimnenê. Tay hemwelatîyê hîsgerî ge ge agahîyan danê ma. Ma Gelîya Pêrî, Gêxî û pêro Çewlîgî de vera nê kerdişan vinderê. Ma wazenê ke na seydwanîya 'huqûqîye' cade wedarîya.''