Qezaya Pulurî ya Dêrsimî de Çimeyanê Munzurî de rotoxê seyyarî xoza kenê lêşin û vera merdiman û xoza bi hawayêkê xedarî têgêrenê. Hemwelatîyê şaristanî pê rotoxan qayîl nîyê. Nê rotoxî çimeyan de seba pîknîkî hacetan û çîyanê werd û şimitişî roşenê. Rixmo ke hemwelatîyî seba ke verê lêşinîya çimeyan bigêrê xîret bikerê zî rotoxî nê kesan asteng kenê. Rotoxan seba na bazirganîye çimeyan de baraka û standî akerdî. Goreyê hemwelatîyan nê barakayî amadekarîya awanîye ya.

Ocaxê Dervîş Cemalî ra Pîr Ahmet Şanliyî ard ziwan ke nê çimeyî goreyê bawerîya elewîtîye fîraz ê û coka lêşinkerdişê çimeyan nêno qebulkerdene. Şanliyî vat: ''Par zî 37 standî ameyî akerdene. Hende bi ke nînan awa çimeyan de firaqî şitêne û awe kerdêne serdin. Ma no qebul nêkerd û nê kesî hîşyar kerdî ke tîya warê sîtî yo. Tay rotoxan tîya de şer kerd. Ma gerreyê înan kerd la vatêne 'Paştê ma zixm o, çew pê ma nêeşkeno.' Nê kesî pê destê dewlete bi hawayêkê sîstematîkî yenê ardene tîya. Nê kesî provakasyon kenê. Wina kenê ke dewlete peynî de vaja 'Şima pê nê cayan nêeşkenê, ez dest nana ser û tede projeyan kena.' Dewlete 2 serran ra nata vera projeyan kena, seba ke çimeyanê ma çin bikera xîret kena. Ma seba ke tîya bipawê çi destê ma ra bêro do bikerê.''