Amerîka şewa şemeyî tewra bombardumanê vera Îranî bibî. Serekê Amerîka Trumpî pare kerd ke seba averberdişê çeka atomî ya Tehranî asteng bikera Amerîka hîrê tesîsê nuklerî bi temamî ‘çin kerdê.’

Roja dişemeyî Îranî seba cewabdayîşî hêrişê baregehêkê Amerîka kerd. Ajansê xeberan ê dewleta Îranî eşkerayîya Pawitoxanê Şorişî pare kerd û vat: ‘’6 fuzeyan da baregehê Amerîka ro.’’

Şewa dişemeyî Trumpî adirbirnayîşê mabênê Îran-Îsraîlî îlan kerd û wird terefan adirbirnayîş tesdîq kerd. Wird terefan zî adirbirnayîş sey serkewtişê xo îlan kerd.

Serekwezîrê Îsraîlî Binyamin Netanyahuyî vat ke înan serkewtişo tarîxî visto destî.

Goreyê CNNyî Amerîka nêeşkaya kapasîteya nuklerî ya Îranî çin bikera. La Trumpî eksê ney îdîa kerd û vat: ‘’CNN xebaranê sexteyan weşaneno.’’

Serekê Fermandarîya Pêroyî ya Îsraîlî Eyal Zamirî vat ke bernameyê nuklerî yê fuzeyî yê Îranî ‘’bi serran’’ erey ameyo vistene.

Roja ewilîne ya adirbirnayîşî de Îranî da zanayene ke ê amade yê ke Amerîka reyde muzakereyê nuklerî bikerê. Rixmê hêrişanê Amerîka zî Îranî kanalê xo yê dîplomasî akerde verdayî.

Serekkomarê Îranî Mesud Pezeşkîyanî dîyar kerd ke şerê 12 rojan ‘’bi hêrişkerîya macerapereste ya Îsraîlî’’ ameyo ferzkerdene. Ey vat ke xêrê xoverdayîşê şarî ra adirbirnayîş ameyo kerdene.

Hukmatê Îranî ra Vervatox Fatemeh Muhajerani îfade kerd ke zeraro ke şer de virazîyayo do bêro çarekerdene û prosesê newera awankerdişî do dest pêbikero.