Dewleta tirke çarçewa şerê çinkerdişî yê vera kurdan de Kurdîstan de merdiman ra heta xoza her çi hedefê dewlete de yo. Şirnexî ra heta Amed, Çewlîg, Dêrsim û Colemêrgî her cayê Vakurê Kurdîstanî vêşeno.

Vervatoxê Platformê Pawitişê Hewselî Vahap Işikliyî derheqê şewarê daristanan de qisey kerd û ard ziwan ke şewatê daristananê Kurdîstanî polîtîkayanê şerê taybetî ra qewimîyenê û vat: ''Tirkîya de şewatî bi giranî polîtîkayanê rantî ra qewimîyenê. Kurdîstan de her serre bi hawayêkê sîstematîkî darîstanî yenê vêşnayene. La nê şewatan rê mudaxele nêno kerdene. Nisêbîn, Cûdî, Gabar, Besta, Licê û Dêrsim bi rojan vêşenê.

Qoricîyî daranê Cûdîyî birnenê û roşenê. Herême hetê leşkeran ra yena vêşnayene. Cayanê vêşayeyan de qereqolî virazîyenê. Nê hewteyan de bi hezaran hektar vêşa. Sebebê nê şewatan her çî ra verî operasyonê leşkerî yê. Nê şewatan reyde vera xoza qirkerdişê ekolojî zî yeno kerdene. 

Rîyê çinkerdişê daristan û xoza ra nêweşê cîya-cîyayî eşkera bîyî. Ça de beno wa bibo ganî ma vera şewatê daristanan vejîyê.  Xoza tesîrê ma kena. Eke darêke zerar bivîna ma zî zerarêkê pîlî vînenê. Şewatanê daristanan de gandarê bînî zî mirenê. Ma sey platformî na mesele teqîb kenê. Daristanî seba heywanan û merdiman herêmê oksîjen û pawitişî yê.  Ganî merdimî wayîrê xoza vejîyê.''