Darê koyê Cûdîyî hetê qoricîyan ra yenê birnayene. Nika zî dewanê Cifane, Nerex, Gilindor û Nêvava yê Şirnexî û dewanê Sorbitnê û Bêşêrî yê Sîlopî de darî yenê birnayene. Reyna waranê Gûrariştê, Gera Rûviya, Şikira Kera û Banê Elî yê dewa Gundikê Remoyî de zî qirkerdişê daran yeno kerdene.

Wekîlê HDPyî yê Şirnexî Huseyîn Kaçmazî derheqê mesele de ANFyî rê qisey kerd û ard ziwan ke netîceya polîtîkayanê AKPyî de daristanê Kurdîstanî yenê vêşnayene û birnayene.

Kaçmazî vat: ''Prosesê çareserîye ra dima sey serranê 90an polîtîkayê şerî hetê AKPyî ra reyna ameyî vistene dewre. Têna Şirnex de nê pêro Kurdîstan de xoza yena talan û wêrankerdene. Hem darê ci yenê birnayene hem zî daristanê Cûdî, Besta, Gabar û herêmê bînî yê Kurdîstanî yenê vêşnayene. Nê darî hetê qoricîyan ra birîyenê û seba rotişî erşawîyenê Tirkîya û Îdlîb. Reyna daristanî yenê çinkerdene û herinda înan de qereqol û kalekolî virazîyenê.  Operasyon û bombardumananê qereqolan de daristanî qestî ra yenê vêşnayene. Tewr peyên qezaya Sîlopî de netîceya bombardumanê Qereqolê Botaşî de koyê Cûdîyî ameyî vêşnayene. Sebenê nê şewaatan polîtîkayê asayîşî yê. Heyf ke bi bahaneya 'waranê biasayîşê taybetî' destûr nêno dayene ke şewatan rê mudaxele bêro kerdene. Îqtîdar vano ê seba hewnakerdişê şewatê daristananê Yunanîstanî amade yê la bi mengan o ke Cûdî, Gabar, Besta, Licê, Çewlîg û Dêrsim de daristanî vêşenê. Selahîyetdarî vera naye bêveng ê. Gelo daristanê Kurdîstanî daristan nîyê? Dişmenîya dewlete ya vera kurdan çimê înan girewtî. ''