Koordînasyonê Heskîfî eşkerayîyêka nuştekîye weşanaye û vat: ''Vîrusê Korona ra semed dinya de zaf projeyanê rijnayîşî ra fek ame veradayene labelê îqtîdarî na rewşe seba xo sey firsendêk dîye.''

Koordînasyonê Heskîfî vist vîrî ke Farqîn, Licê, Erxenî û Êlih zî tede roja dişemeyî dest nayî zaf şaredarîyanê HDPyî ser û îfade kerd ke destsernayîşê şaredarîyan weşîya şarî rê gef waneno.

Eşkerayîye de ame vatene: ''Şaredarîyî vera Korona têkoşîn kenê, seba ke şar bieşko bi weşîyêka başe cuya xo dewam bikero babeta meseleyêka awe û çopî de bêmabên xizmet kenê. Coka destsernayîşê şaredarîyan weşîya şarî rê gef wanenê.''

Koordînasyonê Heskîfî eşkera kerd ke tayînkerdişê qeyûman o nêhuqûqî tesîrê Awbendê Ilisuyî û projeyê HESî keno û vat: ''Şaredarîya Êlihî bire dabî ke dayîşê faturayanê ceyranî bêro taloqkerdene labelê na bire ra 12 saetan ra dima şaredarîye rê qeyûm ame wezîfedarkerdene. Tayînkerdişê qeyûman heman wextî de hêrişê vera heqê awe yê şarî yo. Îqtîdarî mîyanê nê şert û mercan de zî vera heqê awe polîtîkaya xo dewam keno.

Seke yeno zanayene temmuza 2019î ra nata awa  Awbendê  Ilisuyî kêmîyena. Bi mîlyonan gandarî bêawe ra mirenî. Ekosîstem bi temamî yeno çinkerdene.

Wextêkê winasênî de ke Tirkîya û dinya vera vîrusê Korona kampanyaya medişê keyeyî dewam kenê seba ke fekê Awbendê Ilisuyî ame girewtene awe nêresena tay dewan. 199 dewî binê awe de mendî. Têna seba 5 dewan cayê cadayîşî ameyî awankerdene. Dewijê bînî qerqilîyenê ke her hêle de îhtîmal esto ke binê awe de bimanê. Dewijê vera vîrusê Korona pêpawitiş yenê verdene.''

Koordînasyonê Heskîfî waşt ke birê qeyûman cade bêrê batalkerdene, Awbendê Ilisuyî û HES cade bêrê vindarnayene, fekê bendawe bi kontrolî bêro akerdene û awe bêra veradayene.