Badê xoverdayîşê şarê Dêrsiîmî mabênê şaredarîya Dêrsimî û berpirsîyarê ocaxê kerrayan de bire amebî dayene ke dewa Mulu ya Dêrsimî de ocaxê kerrayan o ke 15 serran ra nata aktîf o de beşê şiknayîş û vîjnayîşê kerrayan teşrîna peyêne de do bêro qefilnayene. Roniştoxê dewa Mulu vanê ''Hînî tehamulê ma nêmend ke 6 mengan zî erdê ma texrîb bibo wa cade bêro wedaritene.''

Nê ocaxan zerar da çimeyê çemî zî û gandarê çemî pêro çin bîyî

Roniştoxanê dewe da zanayene ke hem taxa Înonuyê Cêrî de hem zî taxa Înonuyê Corî de ocaxê kerrayan estê û vat: ''Nê mîyanê taxan de warê cuye de xebata xo dewam kenê. Şaredarîye zî xebata înan pey goş kerde heta ruhsat zî da înan. Ma kampanyaya îmzayî daye destpêkerdene. Nê ocaxî zerar danê kultur, xoza û bawerîya Dêrsimî. Nê ocaxan zerar da çimeyê çemî zî û gandarê çemî pêro çin bîyî. Darê ma zî toz û jehrê ocaxan ra wişk bîyî. Xeylêk xebatkarê ocaxî zî semedo ke tedbîr nêame girewtene gole de xeniqîyayî û merdî. Ma nê ocaxî vindarnê ke xoza ma texrîb keno. Na herême herêma vîrî ya ke ganî dest nêro padayene. ''

Şaredarîye çira ma reyde pêvînayîş nêkena û xo ser bire dana, protokol îmza kena?

Îdarekaranê kampanya ra Denîze Bilgîn zî venga partîyan, dezgehan, şaredarîye, hunermendan da ke tewrê têkoşînê înan bibê û vat: ''Hînî tehamulê ma nêmend ke 6 mengan zî erdê ma texrîb bibo. Şaredarîye çira ma reyde pêvînayîş nêkena û xo ser bire dana, protokol îmza kena? Ganî naye ra pey dezgehê ekolojîkî mesuldarîye bigêrê xo ser. Ocaxê kerrayan ganî cade bêro padayene. Seba naye ganî dewijan rê soz bêro dayene û no soz pê eşkerayîya çapemenîye bêro eşkerakerdene. Cayê ke texrîb bîyî ganî tede reyna darî bêrê ronayene. Awa Gelîya Kemere ke dizîyaye ganî reyna Mezelê Dewresî ra bêra ardene. Ma nêwezanê ke hînî dewa ma de proje bêro kerdene. Ma wazenê ke şantîyeyê betonî zî dewe ma ra wedarîyo. Naye ra pey zî têkoşînê ma yê vera nê kesanê ke xozaya ma texrîb kenê do dewam bikero.''

Hetê bînî ra dewijan bînşewe twitter de tegê #MilliKoyundeTalanaSon  akerd û nêrazîbîyayîşê xo mojna.