Qezaya Erdîşî ya Wanî de çarçewa Vurnayîşê Şaristanî yê Beşê 2. de herinda cayanê karan de ke ameyî raşanayene do 'Baxçeyê Mîletî' bêro kerdene. Esnafê ke zerarê madîyî resayî nînan ser wazenê ke mexdûrîyetê înan bêro çareserkerdene.

Erdîş de erdlerzê 2011î yê pîlî de 644 kesan wefat kerdbi û tewr tay 5 hezar kesî zî birîndar bibî. Erdlerz de xeylêk keyeyî û cayê karî zî rijîyabî. Serra 2019î de çarçewa Vurnayîşê Şaristanî yê Beşê 1. de zaf dukanî ameyî viraştene ke qaşo nê dikanî bêpere biameyêne dayene esnafanê ke erdlerz de cayê karê nînan ameyî raşanayene. La TOKÎ nê bînayî bi pereyan vetî rotene. Semedê vaya zêdêre ra zafîn AKPyîjî eşkîyayî nê bînayan bigêrê.

Esnafê Wanî 9 serran ra nata dikananê ke pê îmkanê xo viraştî û barakayan de kar kenê. Esnafî pabeyê viraştişê dikanan ê neweyan bî la qeyûmî Şaredarîya Erdîşî xebere nêdaye esnafan û cayê karê esnafan raşayî. Esnafî bi se hezaran lîra zerar kerdî û seke îfals bikerê.

Esnafêkî vat: ''Xebere nêdaye ma, nşka ra ameyî û vat dikanê xo veng bikerê. Verî ke cayê neweyî bidê, ma dikanê ma ra vetî. Mi bi se hezaran lîrayî zerar kerdî. Kam nê mexdûrîyetê mi çareser bikero?''

Esnafêkê bînî yo ke bi 40 serran o ke Erdîş de kar keno vat: ''Înan dikanê mi rijna. Tede qasê 200 hezar mîlyaran malî estbî. Nika ez nê malî çade roşena? Dikanê ke înan viraştbî zaf vay rotî. Ma nê eşkîyayî bihêrînê. Nika zî herinda dikananê ma de do 'Baxçeyê Mîletî' bivirazê. Ma werd û kar wazenê.''