Çimeyê Munzurî yê Pulurî pê îhaleyê dewlete seba rantî ameyî pêşkêşkerdene. Hemwelatîyê Dêrsimî nêwazenê ke herême de cayê turîstîkî bivirazîyê. Goreyê hemwelatîyan no do bibo sebebê texrîbatî. Odaya Mîmaran vera îhaleyî muracatê mehkeme kerd.

Hemwelatîyanê Dêrsimî zî derheqê mesele de qisey kerd.

Hemwelatîye Hatîce Çelîk vat: ''Çimeyê Munzurî seba ma fîraz ê. Uca îbadetxaneyê ma yo. Munzur kesêko efsanewî yo. Wazenê nê efsane ma destî ra bigêrê û bikerê merkezê bazirganîye. Ma nê çimeyan de qurbananê xo sere birnenê, nîyazanê xo pewjenê, çirayanê xo tavisnenê. Her kes uja de duayanê xo keno. ''

Hemwelatîya bîne Gulîzare Çelîk zî nê çîyî ardî ziwan: ''Wa destê xo nêdê Munzurê ma. Ma otêl nêwazenê. Ma do destûr nêdê nê texrîbatî. Înan ma qir kerdî la nêeşkîyayî ma acîz bikerî.''

 Guru Şengul vat: ''Ma têna wazenê ke Munzur wa wina bimano. Wa Munzur lêşin nêkerê, uja seba ma erjîyaye yo. Ma deyndarê Munzurî yê.''

 Elîfe Yildiz pare kerd ke Munzur cara ê înan o û wina dewam kerd: ''Ma tîya de merdî bermayî. Ma Munzur Baba nêdanê çewî zî. Munzur Baba û Çimeyî mîras ê ke ma domananê xo ra verdenê. Ma do destûr nêdê ke ê cayanê ma texrîb bikerê, birijnê û zerar bidê ci.''