Vera Çimeyanê Munzurî yê Pulurî yê Dêrsimî yê ke semedê elewîyan bimbarek ê, rixmê nêrazîbîyayîşê şarî projeyê talankerdişî yo ke menga tebexe de binê nameyê ''serûberkerdişê dormeyî'' de ame destpêkerdene, hetê Daîreyê 13. yê Mehkemeya Berze ra ame betalkerdene.

Projeyê talankerdişî yê vera Çimeyanê Munzurî yo ke bi koordînekerdişê Walîyê Dêrsimî hetê Ajansê Newekerdişî yê Firatî (FKA) ra ame amadekerdene û hetê Heyetê Herême yê Pawitişê Estbîyayîşanê Kulturî yê Erziromî ra 2019î de ame qebulkerdene, menga tebaxe ya 2020î de amebi destpêkerdene.

Projeyo ke bê persayîşê şarî, şaredarîyan û rêxistinanê komelê sîvîlî ame kerdene cayê bimbaberekî yê elewîyan hedef girewtêne û badê qedîyayîşê projeyî dekewtişê çimeyan do bibîyêne bi pere.

Rixmo ke vera nê porojeyî zaf çalakîyî ameyî kerdene şar wayîrê cayanê xo yê bimbarekan vejîya Çimeyanê Munzurî de makîneyê karî ameyî şuxulnayene û serê Çemê Munzurî de pirdî ameyî viraştene. Avukatanê Dêrsimî vera nê rijnayîşê vera ercanê elewîyan muracatê Daîreyê 13. yê Mehkemeya Berze kerd.

Avukat Bariş Yildirimî hesabê xo yê medyaya sosyale ra da pêhesnayene ke projeyê talankerdişî yê vera Çimeyanê Munzurî hetê Mehkemeya Berze ra ame betalkerdene.