Dewleta tirke bi 97 serran o ke Kurdîstan de kargehêk nêviraşt û ciwananê kurdan metropolanê Tirkîya de bi pereyanê tayan dana xebitnayene. Têna 5 serranê peyênan de tewr tay 50 ciwanê wanijî înşaatanê metropolan ra ginayî erdî û merdî, bi desan ciwanî zî astengdar bîyî. Rîxmê nê şert û mercan ê xiraban kurdî bi îmkanê xo kenê ke biciwîyê.

Saît Yaşar û embazê ci zî nînan ra yê. Ciwananê kurdanê ke dormeyê hostayê Saît Yaşarî de ameyî pêser kargehêkê berardişî awan kerd û dest pê berardişê sabunan kerd. Têkilîya Saît Yaşarî ya bi berardişê sabunan se serrî verê cû dest pêkena. Pîrikê ci Mehmet Efendî yo Tutuncu serranê 1910î de binê Kelaya Wanî de hostayêkê armenî ra viraştişê sabunan museno. Ewro na xebata Tutuncuyî hetê tornanê ci ra yena dewamkerdene.

Saît Yaşarî derheqê babete de qisey kerd û îfade kerd ke viratişê sabunan seke înan rê mîras mend. Yaşarî ard ziwan ke o zaf şayî yo ke ewro zî nê viraştişê sabunan dano dewamkerdene û vat: ''Pîrikê mi hostayêkê armenî ra musa ke sabun û findan senî bivirazo. Nika ma nê karî kenê. Ma 17 tewiranê sabunan virazenê. Sabunê ma tabîyî yê û seba egzama, kênayîş, sedef, rişîyayîşê gijikî derman ê; tede madeya kîmyewîye çin a. Ma berhemanê xo îxracê Başûrê Kurdîstanî kenê. Ma hetê peyî de pê destanê xo ber anê, ambalaja ci ra bigêrê pêro malzemeyê ke tede yê tabîyî yê. Ma wazenê ke bi ambalajanê ke newe ra eşkenê bêrê vurnayene xoza bipawê.''