Kurdîstan de xoza qestî ra hetê dewlete ra yena qirkerdene. Bi taybetî nê rojan de serkêşîya leşker û qoricîyan de darî birîyenê. Herêmanê Besta, Cûdî û Gabarî yê Şirnexî de 2 serrî yo bi bahaneya 'asayîşî' binê çimdarîya leşkeran de darî birîyenê. Reyan dewa Samosî ya qezaya Xozatî ya Dêrsimî de binê kontrolê leşkeran de bi mengan o darî birîyenê û destûr nêdîyeno ke dewijî şorê herême.

Komeleya Ekolojî ya Mêrdînî ra Derya Akyol derheqê babete de ANFyî rê qisey kerd.

Akyole îfade kerd ke Kurdîstan de talanê xoza armancê rantî reyde sey polîtîkayêka şerê taybetî yeno kerdene. Akyole pare kerd ke armancê tewr pîl ê polîtîkayanê şerê taybetî zî koçkerdiş û asîmîlekerdiş o.

Akyole vat: ''Şarê Kurdîstanî raştê pêro hêrişan ame, têkoşînê vera wêrankerdişê ekolojîkî de tedayêka girane  dîye. Mîyanê komelê Kurdîstanî de hişmendîya komelê ekolojîkî astêka avere de ya. Vera birnayîşê daran bi taybetî Şirnex de têkoşîn dewam keno. Goreyê qanûnan birnayîşê daran sûc o. La bi polîtîkayanê şerî bi bahaneya 'asayîşî' birîyayîşê daran yeno meşrûkerdene. Polîtîkaya bêcezaverdayîşî zî sey sîstemêkî dewam kena. Rixmê ney zî dezgehê ke îdîaya pawitişê xoza kenê, vera rewşa Şirnexî bêveng ê. Sey qirkerdişê kurdan qirkerdişê xozaya înan zî sey meşrûyî yeno dîyene.

Tîya de têkoşînêko komelkî lazim o. Çunke zeraro ekolojîk têna herêmêke de nêmano. Na babete pêro dinya eleqedar kena.''