Êlih de qeyûmî zaf dezgehê kulturî girewtbi. Nê dezgehan ra yew zî Keyeyê Kulturî yê Dengbêjan bi ke tede dengbêjîye ser o xebatî ameyêne kerdene. Keyeyê Dengbêjan hetê Şaredarîya HDPyî ya Êlihî newe ra ame akerdene. Keyeyê Dengbêjan de 2ê ci cînîyî 11 dengbêjî xebatanê xo kenê. Her roje 2 dengbêjî Keyeyê Dengbêjan de meymananê xo pêşwazî kenê, her roja şemeyî zî dîwanê dengbêjan yeno ronayene û dengbêjî estanike, hîlaye, kilam û deyîranê xo vanê.

Dengbêjê keyeyî ra Ehmedê Xîyî bala ante girîngîya Keyeyê Dengbêjna ser û vat: ''Qeyûmî têna na bîna padabî. Dengbêjîye na bîna ra nêna werte. Qeyûm nêeşkîya zerrî û ziwananê dengbêjan rê kilît bido. Ma dewam kerd ke kilamanê xo vajê. Ma qehwexaneyan de, kafeyan de her ca de kilamê xo vatî. Ma sebir kerd. Şaredarîye Keyeyê Dengbêjan newe ra akerd. Ma mîyanê şarî de yê, ma xoverdayîş, dej, heskerdiş, têkoşînê şarê xo yê. Ma bi serran o ke tarîxê kurdan kirişnenê ewro. Ma armanc kenê ke tîya de dengbêjîye bidê şinasnayene û ciwanan rê perwerdeyê dengbêjîye bidê.''

Dengbêjan ra Perîxana Şirnexî zî vat: ''Zaf cinîyê dengbêjî estê ke nênê şinasnayene. Qeyûmî wexto ke berê tîya girewt, waşt ke nê dengbêjî zî bêrê vîrakerdene. La ewro bi hezaran cinîyî estê ke wazenê nê kulturî bidê dewamkerdene.''