Taxa Sortkînî ya qezaya Şaxî ya Wanî de Dêra Surp Dîgînî rijîyayîşî reyde têrî mende.Nameyê taxe zî 'Surp Dîgîn'(Azîze Xanime) ra yeno. Dêra ke seserra 9. de virazîyaye bi herre bîye pirr. Seba ke dêre bi serran hedefê gêrayoxanê xezîne de bibî hele mende ke birija.

Hemwelatîyê dewe Qirkerdişê Armenîyan ê 1915î ra dima dewe de ca bîyî.

Hemwelatîyan ra Remzî Kartalî waşt ke wa dêre restore biba û vat: ''Her serre yew parçeyê dêre rijîyeno. Semedo ke tîya de vewre zî zaf varena dêre texrîb bena.''  

Reyna dewijan ra Ahmet Tucîyî vat: ''Senî ke camî seba ma ercîyaye yo dêre zî seba armenîyan hende ercîyaye ya. Vanê verî zaf keşîş û karwanî ameyêne na dêre de mendêne. Verî na dêre zixm bibî la rîyê gêrayoxanê xazîne ra wina bîye. Ma wazenê dêre wa restore biba û seba zîyaretî bêra akerdene.''