Startê Festîvala Gêroke ya Fîlman a Fîlmmor a Cinîyan a 18. Îstanbul de 16ê adare de do bêro dayene. Mojnayîşê fîlman do heta 22ê adare Merkezê Kulturî yê Fransizî de do bêrê kerdene û dima zî Merkezê Kultur û Hunerî yê Kuçukçekmece de do dewam bikerê. Çarçewa festîvale de bi Sînebuse 6 dewê Îstanbulî bêrê gêrayene.

Festîvale dima 4-5ê nîsane de Mugla de, 11-12ê nisane de Antalya de, 18-19ê nîsane de Mersîn de, 25-26ê nîsane de Yalova de,  2-3ê gulane de Adana de û 9-10ê gulane de zî Amed de do bêra kerdene.

Festîvale de pêro aktîvîteyî û mojnayîşê fîlman do bêpere bibê. 

Emser festîval de binê beşanê ''Sînemaya Heqî'', ''Sînemaya Cinîyan'', ''Bedenê Ma Ê Ma Yê'', ''Cînsîyî'', ''Vîro Femînîst'' û ''Taqîbê Fîlmî'' de 21 welatan ra 47 fîlmî do bêrê mojnayene. 

Çarçewa festîvale de panelî, kargehî, xoşeberî do bêrê serûber kerdene. Îdarekara japone ya  fîlmê ''Direnen Kadinlar'' Chieko Yamagami do meymana festîvale biba.

Xelatê Bamyaya Zerdêne zî do peynîya festîvale de bêrê dayene.

Fîlmmor serra xo ya 18. bi şîarê ''Heqo têdûşt! War, meaş, telîf lutuf nîyê, dîyarî nîyê; heqê cinîyan ê''  pêro cinîyan reyde fîraz keno.