Kolektîfê Sînema yê Mezopotamya Festîvala Fîlmanê Kurdan a Îstanbulî ya 2. do mabênê 24-29ê adare de bîyaro ca. Çarçewa festîvale de 6 rojan her parçeyê Kurdîstanî ra 27 fîlmî do bêrê mojnayene.

Kolektîfê Sînema yê Mezopotamya ra Xezale Gultekîn derheqê festîvale de ANFyî rê qisey kerd.

Xezale Gultekîn ard ziwan ke seba festîvala diyîne înan babetêka taybete eşkera nêkerda û vat: ''Ma do festîvale de 27 fîlmanê dergani kilman û dokumenteran bimojnê. Ma kenê ke salonan de şarê xo bîyarê yew ca. Fîlmê ma do çar parçeyanê Kurdîstanî ra bibê. Dîrektorê zafê fîlman zî do salonan de amade bibê. Fîlmê 'Kurdên Êzidî' yê Amasî Martirasyanî ke 1933 de amebi girewtene û heta nika nêamebi mojnayene, do festîvale de bêro mojnayene.''

Xezale Gultekîn rewşa nikayêne ya sînemaya kurdan ser o wina vat: ''Zehmet o ke merdim sînemaya kurdan rewşa nikayêne de cayêkê dîyarkerdeyî de îfade bikero. Labelê rixmê pêro astengîyan zî merdim eşkeno vajo ke dormeyê hişmendîyêka sînema ya xoverdayoxe de sînemaya kurdan aver şina.''