Hunermend û roşnvîrê ke bajarê Kolnî yê Almanya de ameyî têhet bi eşkerayîya hempare PDKyo ke hêrişê îxalî yê dewleta tirke rê hemkarîye keno, hîşyar kerd.

Eşerayîya ke bi nameyê hunermendanê kurdan dameye dayene de bale ameye antene muhîmîya prosesî ser û vatene ke dewleta tirke verê çimanê heme dinya hîrê mengan ra zafêr o ke vera merdimîye sûc kena, vera gerîlayan û şarê kurdî hêrişê qirkerdişî kena. Dewleta tirke ya îşxalkere tay hetanê kurdan bitaybetî zî PDKyî goreyê karê xo şuxulnena û wazenê bianco mîyanê şerê wayûbirayî.

Eşkerayîye de ame vatene ke bi nê şerî yewîya neteweyîye yena hedef kerdene û ca dîya nînan: ''PDK bi şuxulnayîşê hezanê xo yê taybetan hem hêrişê îşxalî yê dewleta tirke keno meşrû hem zî wazeno verê têkoşînê gerîlayan bîgêro. Ma sey hunermananê kurdan vanê ke PDK ganî cade hêzanê xo waranê gerîlayan ra peyser bianco. Ganî PDK vera hêrişê îşxalî yê dewleta tirke vejîyo û semedê yewîya neteweyîye game bierzo.

Qet yew partî û hêzê kurdan nêeşkeno kişta dişmenê nê şarî de vindero. Sere de Başûrê Kurdîstanî de ganî heme leteyanê Kurdîstanî de roşnvîr û hunermendî vera PDKyî ke xizmetê dewleta tirke keno, nêrazîbîyayîş ramojnê. Hema ke rewşe zafêr xirab nêbîya ganî nika bi vengê berzî şerê mîyanê kurdan rê vajîyo Nê. Na berpirsîyarîya tarîxkî û ehleqî ya.''

Hunermend Hozan Dîyarî seba ke şerê mabênê kurdan reyna bîyo rojdem no sey şermê pîlî hesibna û vat: ''Ganî ma dişmenê xo hol nas bikerê.Ferqê Erdogan û Sedamî çîn o. Semedê yahûdîyan Hîtler çi îfade keno , Erdogan zî semedê kurdan eynî çî îfade keno. Eke ma dişmenê xo nas mekerê no eybo pîl o. Eke ma dişmenî nas kenê û ci rê bibê hemkar no zafêr eyb o.''

Hunermend Şiwan Perwerî zî vat: ''Ganî sîyasetê kurdan destûrê şerê wayûbirayî medo. Se beno wa bibo ganî ma destûrê nayî medê. Heme rayberanê ma vat. Kam yew leteyê Kurdîstanî bikewo tehluke leteyo bînî zî tehluke de yo. Tirkî wazenê şaran biverdê pê. Ma çew/e nêxapîyo. Ewro ganî ma xo nê tayînkerdişê qederê kurdan bifikiryê. Ma domanê nê şarî yê. Pêşmerge zû gerîla zî domanê nê şarî yê.'' Perwerî veng da Mesût Barzanî û vat: ''Hinî hewceyê ruhê yewîye esto. Roje roja şerî nêya. Kek Mesût to soz dabi. Destûr medê wa gerîlayî, pêşmergeyî, domanê pê destê yewbînan bimirê.''

Reyna hunermendaê sey Ganî Nar, Besere Şahîn, Nebes Abdullah, Kakşar Oremar û Peywan Arjînî zî vera hêrişê dewleta tirke û paştdayîş PDKyî nêrazîbîyîş ramojna û semedê yewbîyayîşê kurdan veng da.

Hunermendê ke tewrê eşkerayîye bîyî nameyê înan wina yê:

Ozan Seyîdxan, Ganî Nar, Ozan Comerd , Cewad Mervanî, Hozan Şemdîn, Peywan Arjîn, Hekîm Sefkan, Denîze Deman, Tulaye Şahmaran, Zozane Zudem, Binevşe Roj, Ersîn Çelîk, Mustafa Şahîn, Besere Şahîn, Bulent Turan, Sosine, Kakşar Oremar, Serhat Med, Memo Gul, Alî Îkîzer, Nelbest Abdullah, Amele, Şîrîn, Pêrî, Alî Zulfîkar.