Însîyatîfê Hunerî yê Dêrsimî ra hunermendan Hasan Saglam, Îpeke Reçber, Umut Altınçag û Mîkaîl Aslan û Parlamentera Partîya Keskan ê Swîsre Sîbele Arslan û lajê Yilmaz Çelîkî Asmen Çelîk zî tede heyetêk  paytext Bern de Wezaretê Karanê Teberî yê Swîsre de pêvînayîş kerd.

Pêvînayîş de hukmatê Swîsre ra ame waştene ke Yilmaz Çelkîko ke hemwelatijê înan o û bilaheq Tirkîya de zîndan de yeno tepiştene wa semedê ey çîyêk bikerê. Heyet waşt ke hukmatê Swîsre bikewo dewre û pêvînayîşanê fermîyan bikero ke Çelîk zîndan ra bêro vetene. Badê pêvînayîşî heyet eşkerayîya çapemenîye daye. Goreyê xebera PÎRHA çapemenîya Swîsre zaf eleqe ramojna.

Vera Polîtîkaya Hêrişkare Cewabo Tewr Gird Vengê Şarî Yo Hempar o

Eşkerayîye de nê ameyî vatene: Ewro Tirkîya de xeylêk emazê ma yê roşnvîr û hunermendî bi hêrişê polîsan bîlasebeb yenê destbendkerdene û tepiştene. Hunermendê ke bi deyîranê xo dej û kêfê şarî anê ziwan  înan ra Ozane Cane, Grup Yorum, Şenol Akdag û tewr peynî de zî Yilmaz Çelîk bêhuqûq ameyî tepiştene. Nê têna çend nimûneyî. Ma sey roşnvîr û hunermendanê Dêrsimî welat de û bitaybetî zî Dêrsim de nê zextê vera şar, muxalîf, hunermend, ronvîr û niştoxan şermezar kenê. Vera polîtîkaya hêrişkare cewabo tewr gird vengê şarî yo hempar o. Zanayîşê edaletî yê şaran o.

Deyîrê Ma Hunerê Ma Yê Rindkerdişê Dinya Yo

Ma bi nameyê Yilmaz Çelîkî û heme hunermendê ke raştê zextanê keyfîyan yenê qisey kenê. Hunerê şarî azad o û  îşligê îqtîdarî xo ra nêdano. Ma do bi deyîranê xo kulturê ke vînî bîyî û bîyî qedexe û sey ê bînî yenê vînayene û qîrayîşê nêçeran bidê eşnawitene û bikirişê ameyoxê şarê xo. Embazê ma yê ke ameyî tepiştenê sûcê înan no yo. Ma zî nê sûcî kenê. Deyîrê ma hunerê ma yê rindkerdişê dinya yo. Ma do bi hunerî qala azadîye bikerê.

Ma hukmatê Swîsre ra waşt ke wa semedê Yilmaz Çelîkî yo ke hemwelatijê înan o pêvînayîşê fermî bidê destpêkerdene û semedê qedînayîşê na bêhuqûqîye berpirsîyarîya xo bica bîyarê. Reyna wa bi heyetêkê çimdarî tewrê dewrê dewaye bibê.‘‘