Koma Hêvî Yekda ya ke Kampa Multecîyan a Mexmûrî de binê sîwana merkezê kultur û hunerî de karê tîyatroyî kena kayê xo yê neweyî ''Bûka Axê'' do pêşkêşê roniştoxanê kampe bikerê.

Koma ke wisar de dest pê termînê neweyî kena mengêke kargehê tîyatroyî de karê perwerdeyî kena. Provayê seba kayê 'Bûka Axê' safî bîyî. Kayo ke hete Tîyatroyê Çîya ra ame nuştene û hetê Koma Hêvî Yekda ra ame kaykerdene îdarekarîya ci zî Ekîn Ronî kena.

Koma tîyatroyî provaya xo ya pêroyîye 21ê sibate de pêşkêşê 25 seyrkerdoxan kerd, rexne û pêşnîyazê seyrkerdoxan girewtî amadekarîya xo ya peyêne temam kerde.

Kay bi nê hawayî 28ê sibate de do bêro mojnayene. 6î ra heta 13ê adare zî do reyna bêro mojnayene. Heman wextî de 27ê adare de Roja Tîyatroyî yê Dinya de zî seba vîrameyîşê hunermend Tekta Herekolî bi bernameyêkê taybetî kay do bêro pêşkêşkerdene.

Kayê 'Bûka Axê' qala dej û nakokîyanê serra 1990an de hetê dewlete tirke ra bi vengkerdişî û vêşnayîşê dewanê kurdan keno. Xerîbbîyayîşê dewan ra û koçê ver bi şaristanan zî kay de yenê behskerdene.