Fîlmê 'Nameyê Ji Şingalê' reya verêne serrgêra Fermanê 3yê Tebaxa 2014î de şaristanê Celle yê Almanya de, dima zî pêro Ewropa do bêro mojnayene.

Kaykerdoxê fîlmî Alî Avarî ANFyî rê qala hîkayeya fîlmî kerde.

Avarî da zanayene ke fîlm qala xoverdayîşê êzidîyan ê vera DAÎŞî keno û vat: ''Kurdî bi se serran o xo ver danê. No fîlm nê xoverdayîşan ra beşêkî mojneno. Ez fîlm de rolê Dilşêr Herekolî kay kena ke şarê Şingalî hema zî bi  minetî ey yad keno.''

Fermandaranê HPGyî ra Dilşêr Herekol 3yê tebaxa 2014î de Şingal de vera hêrişanê DAÎŞî pa 12 gerîlayan Koyê Şingalî de xo resnabi hewarê şarî. Herekol Koyanê Amanosî de 18ê teşrîna verêne ya 2020î de hêrişê dewleta tirke de şehîd bibi.

Alî Avarî wina qala rolê xo kerde: ''A raşte ez ey reyde heman warî de menda. La rixmê ney zî ez nêzanena ke gelo ez layîqê nê rolî bîya yan nê. Wexto ke ma fîlm antêne mi eşnawit ke embaz Dilşêr Herekol şehîd bîyo. Ney zaf tesîrê mi kerd. Ez hîna waf wayîrê rolê xo vejîya û mi xîret kerd ke karêkê hîna serkewteyî bikera.''

Avarî vist vîrî ke hêzê YPG û YPJyî zî tewrê xoverdayîşê Şingalî bibî û fîlm qala înan zî keno.

Avarî da zanayene ke netîceya xoverdayîşê gerîlayan û şerwananê YPG û YPJyî de Şingal ameyo xelisnayene.

Avarî vat: ''Hema zî Şingalî ser o tehlukeyî dewam kenê. Labelê şehîdan kerd ke ma payan ser de vinderê. Ganî ma înan xo vîr a nêkerê. Fîlmê ma hîkayeya înan a.''