Kemeleya Edebîyakeran, Koma Wendişî ya Amedî û Platformê Qelema Cinîyan ê Mezopotamya bi wesîleya 8ê Adare Roja Cinîyan ê Kedkaran a Dinya panelê bi nameyê ''Edebîyat û Cinî'' serûber kerd. Koma Wendişî ya Amedî ra Ayşe Kuran moderatorîya panele kerde û vervatoxa Têgêrayîşê Cinîyan ê Azadan (TJA) Ayşe Gokkan û şaîre Roza Metîna zî sey qiseykerdox beşdarê panelî bîyî. 

Vervatoxa TJA Ayşe Gokkan îfade kerd ke ê hewteyê 8ê Adare de yê û her ca binê îşxalî de yo. Ayşe Gokkan vat: ''Nuştoxê camêrdî hîkayeyanê xo de, edebîyatê xo de bi hawayêkê cînsîyî nêzdîyê cinîyan benê.  Êyê ke bi hîşmendîya îqtîdarî nusenê herinda cinîyan de bire danê, fikirîyenê û vanê qey no înan sey têduştgîr û demokrat mojneno. No edebîyat nîyo heqaret o. Cinîyî edebîyat de wina yenê mojnayene; domanan weye kenê, binê emrê camêrdan de yê, gureyê keyeyî kenê. Yeno waştene ke cinîye sey populer bimojnê. Edebîyatê kapîtalîzmî de zî cinîyî sey objeyê cînsîyî û romantîk yenê mojnayene.''

Şaîre Roza Metîna zî safhaya cinîyan ser o vinderte û vat: ''Keda cinîyan a warê edebîyatî û dengbêjîye de sey çin yena hesibnayene. Mîsal Cemîla Celîl, Casimê Celîl û Celilê Celil nênê şinasnayene la nê cinîyan kedêka pîle daye edebîyatê kurdî. Cinîyan rayberîya kulturê dengbêjîye kerde. Wezîfeyê ma yo ke ma nê cinîyan bidê şinasnayene. Ganî ma xo rêxistin bikerê û nê xebatan aver berê.''

Panel beşê cewab û persan ra dima qedîya.