Çarix kulturê kurdan de cayêkê girîng gêno. Nê çarixî teberê welatî de zî zaf yenê rotene. Çarixê ke wayîrê tarîxêkê kahanî yê Wan de têna cayêk de yenê rotene. Mûyê bize û kendîr ê ke çarixî nînan ra yenê viraştene, têna dewanê Bazîdî û Îdirî ra yenê peydakerdene.

Hostayê solan Mecît Emen  15 rojan de yew çiftê çarixî virazeno. Mecît qerardar o ke tradîsyonê çarixî dewam bikero. Mecît Emen viraştişê çarixan musna birayanê xo zî û 32 serr ê ke nê karî keno.Mecît Emenî vat: ''Ma nînan bi temamî pê destî virazenê. Coka tay yenê viraştene. Çarixî berhemanê xozayî ra yenê viraştene û naye ra weşîye ra fayde kenê. No mîrasê ma yo kulturî yo. Nika karê ma zor o. Sey sektoranê bînan ma mîyanê zehmetîyan de yê. Krîz tesîrê ma zî keno. Merdimê ma seba dewamkerdişê kulturê xo çarixî zaf girîng vînenê. Naye ra ma rê hetkarîye kenê.Ma ganî kulturê xo bipawê. Ez nika viraştişê çarixan musnena birayanê xo û ê zî nê karî dewam bikerê.''