Nergîze: Cinîye çimeyê îlhamê hunerî ya

Hunermendaflutî Îreme Nergîz ard ziwan ke cinîyî destpêkê tarîxî ra nata parçeyê hunerî yê û vat:''Cinîyî bi se serran o çimeyê îlhamê hunerî yê.''

Tarîxê flutî  Î.V. serranê 900an de dest pêkeno. Flut seserra 12. ra nata zî bi parçeyê muzîkê Ewropa.

Amed de Îreme Nergîz 3 serran ra nata flut cênena. Îreme derheqê xebetanê xo yê hunerî de ANFyî reyde qisey kerd. Îreme nika hem xebatanê xo yê muzîkê kurdkî dewam kena hem zî Komeleya Huner û Kulturî ya Dîcle Firatî de dersê flutî dana. Îreme da zanayene ke a domanîya xo ra nata hunerê flutî de eleqedar bena û wazena ke bi enstrumanê xo muzîkê kurdkî bicêna.

Îreme Nergîz serra 1998î de dewa Şêlimanî ya qezaya Farqînî ya Amedî de dadîya xo ra bîye û heman serre keyeyê ci neçare mend ke koçê qezaya Yenîşehîrî bikero.

Îreme îfade kerd ke keyeyê ci zî hunerî ra hes keno û babîyê ci tim pê înan dengbêjî goştarî kerdêne. Îreme vat: ''Coka ez kilamanê dengbêjan ra zaf hes kena. Ez serra 2018î ra nata flut cênena. Mi 2 serran perwerdeyê flutî girewt. Ez nika zî Komeleya Dîcle-Firatî de dersê flutî dana. Nika Korona ra ma mabên da la ez hêvî kena ke wextêkê kilmî de biresa embazanê xo.''

Îreme Nergîz ard ziwan ke cinîyî tarîx de tim parçeyê hunerî bîyî û vat: ''Ez sey yew cinîya kurde wazena hunerê kulturê xo bikera. No seba mi rûmet o. Kurdî do xebetanê xo yê hunerî dewam bikerê.''