Vervatoxê Platformê Ziwanê Kurdkî yo ke newe ronîyayo Şerefxan Cizîrîyî vat înan qerarê konkretî yê ewilênî girewtê. Cizîrîyî vat ke ganî şarê Kurdî de hişmendîya ziwanî virazîyo û veng da partî, sazî û şexsan.
9 partîyanê Kurdan seba ke hemverê polîtîkayanê asîmîlasyonî yê serê Kurdkî de vinderê Platformê Ziwanê Kurdkî awan kerdibi.
Vervatoxanê platformî ra Şerefxan Cizîrîyî derheqê xebatanê ke do bikerê de kombîyayîşê çapemenî viraşt. Cizîrîyî vat ke înan seba platformî 3 vervatoxî bewlî kerdê û nê vervatoxî 3 mengan ra reyêk bivurîyê. Cizîrî vat înan hîrê grûbê xebate awan kerdê û nê grûbî zî do seba “viraştişê rayapêroyîye”, “hewilnayîşê waştişan bi hukmatî” û “kerdişê xebatan bingeyê peymannameyanê mîyanneteweyîyan de” bixebetîyê.
'GUREYÊ HER KESÎ'
Cizîrîyî vat ke viraştişê hişmendîya ziwanî şarê Kurdî de gureyê her kesî yo û xebata înan zî do seba nê bibo. Cizîrîyî heman wextî de vat ke 21ê Sibate Roja Ziwanê Maye ya Dinya de do aktîvîteyan virazê û ganî 21ê Adare Newroz de ziwanê Kurdkî babeta serekeyan ra bo.
Cizîrîyî peynîya qiseykerdişê xo de nê vatî: “Ganî heme partî û sazîyê Kurdan kombîyayîş, çalakî û aktîvîteyanê xo bi Kurdkî bikerê. Ma seba lehçeya Kirmanckî warêkê xusûsîyî akerd. Ma do xebatanê xo şaristananê bînan de zî bidê dewamkerdene. Ganî kesê ke xo seba weçînitişan partîyanê Kurdan ra namzed danê ro Kurdkî bizanê. Nûştox, roşinvîr û hunermendê ma zî bê ke paweyê dawetî bê tewrê xebatanê platformî bibê.”
