Merkezê Komelê Mezopotamya (NÇM) yo ke 30 serrrî verî vera qedexekerdişê kultur û ziwanê kurdkî amebi awankerdene, rixmê hende teda û qedexeyan zî tim berardişî rê dewam kerd. Şayîya serrgêra 30. ya ronayîşê NÇMyî 16ê teşrîna peyêne de hetê Qeymeqamîya Kadikoyî ra amebî qedexekerdene. 

Kedkarêkê NÇMyî peykertiraşî Şahîn Doganî derheqê tedaya vera înan de ANFyî rê qisey kerd.

Doganî îfade kerd ke ronayîşê Komara Tirkîya ra nata teda dewam kena û vat: ''Komara Tirkîya netewe-dewlet a ke xo ra ber şansê estbîyayîşî nêdana qet yew şarî. Komare kurdkî tim xo rê sey tehlukeyî dîye. 100 serrî yo dewlete polîtîkaya qirkerdişê ziwan û kulturê kurdan ra  fek vera nêdaya. Ewro hînî nameyê na polîtîka 'Şark-Islahatî' nê 'planê Çokdayîşî' yo.

NÇM vera hêrişanê dewlete cewabêk o. NÇM nika hêrişanê giranan de têrî yo. Ma pê qedexeyan şaş nêbenê, çunke faşîzm çita yo ma zanenê. Dewlete ewro kêm bibo zî estbîyayîşê kurdan qebul kena la sebebê ney zî têkoşînê kurdan o. Seba ke NÇM dezgehêkê kurdan o xora nê têkoşînî ser o xo rêxistin kerdo. NÇM hema zî bi kelecanê roja verêne berardişî rê dewam keno.''

Doganî îfade kerd ke qedexeyî tim estbîyî la qedexeyî do nêeşkê bikerê ke NÇM qels bibo. Doganî vat: ''Senî ke 30 serrî NÇMyî xo ver da, do reyna xo ver bido. Ma do îmkananê xo biafernê, ma do sehneyan awan bikerê. Qedexeyî nêeşkenê ma qels bikerê eqsê xi ma xurtêr kenê. Ma xîret kenê ke pê îmkananê xo çîyêk bivejê werte û her ca de bernameyanê xo bikerê.

Ewro îmkanê warê dîjîtalî zî estê. Eke ma konserê xo yê serra 30. bikerdêne beno ke ma xo biresnayêne 5 hezar kesî. La konser ame qedexekerdene û ma xo resnayî 100 hezar kesan. Dewlete xîret kena ke nefesgirewtişê şarî zî qedexe bikera. Têkoşîn yew o û kultur û hunerî zî lingê nê têkoşînî yê.''