Şaristanê Wintherthurî yê Swîsre de 2yê temmuze de Festîvala Domanan do bêra kerdene. Festîvale do serkêşîya Komelê Kurdan ê Demokratîkî yê Wintherthurî (CDK-W) de bêra kerdene û amadekarîyê ci qedîyayî.

Festîvale 2yê temmuze de roja yewşemeyî, saete 10.00 de warê Wuartierverein Gutschickî de ya. Koroyê Zarokan festîvale de do vejîyo sehne ser, tîyatroyê domanan do kay bikero, palyaçoyî performanê xo do bimojnê û musabeqayî do bêrê kerdene. Hunermend Serhado, Elenora Gelawêj û Bulent Tûran festîvale de do vejîyê sehne ser.

Hemserekê CDK-Wyî Îsmaîl Kayayî derheqê festîvale de ANFyî rê qisey kerd û pare kerd ke festîvale hetê meclîsê domanan ra yena kerdene.

Kayayî vat: ''Dîaspora de reya verêne festîvalêka winayêne yena kerdene. Domanan hunermendê festîvale bi xo weçînayî. Planê festîvale bi temamî goreyê qeraranê înan ame kerdene. Reya verêne domanî do serkêşîya ma bikerê ke no zaf manadar o. Seba festîvala domanan komîteyêke awan bîye. Nê domanî heman wextî de wendekarê kursanê kurdkî yê. Warê festîvale de 10 standan ra 9ê ci de domanî do cabigêrê. Stando bîn do aîdê komele bibo. Ma venga pêro kesan danê ke festîvala domanan bibê. Ma domanan nê karî de teyna nêverdê.''