TEV-ÇAND, Têgêrayîşê Kulturî yê Cinîyan Hîlala Zêrîne û Komîteya Domanan a Şilêre seba domanan projeyê tîyatroyî kenê. Proje dîyarîya 5 domananê kênayan ame kerdene ke 18ê tebaxa 2022yî de hêrişê dewleta tirke de şehîd bibî. Nê kênayan ra Silava Ramazan fîlmanê Çîrokên Bajarên Wêrankirî de kay kerdbî.

Tîyatroyê domanan seba 5 kênayanê ke 18ê tebaxa 2022yî de hetê dewleta tirke ra ameybî qetilkerdene, bi şîarê 'Azadîye bi domanan dest pêkena' tebaxe de 14 kayan do serûber bikero. No proje heman wextî de bingeyê festîvala domanan o zî.

Bi nê projeyî yeno waştene ke domanê Rojawanî pê tîyatro, huber û kulturî biciwîyê. Domanê ke binê gefê şer û hêrişan de yê, bi kêfweşî tewrê projeyî benê. Domanî pê destûrê keyeyanê xo hewte de di rojan tewrê perwerdeyî benê. 

Nê projeyî mamostayê xo zî afernayî. Dêrikî ra heta Şehba 12 mamostayê tîyatroyî xeylêk cayan de bi koordînasyonê projeyê domanan perwerde danê. Proje de 14 komî û bi temamî 200 domanî cagênê.

Çarçewa projeyî de 5ê tebaxe de kayê Pîrê û Rovî, Sê Bira, Mişk û Şêr, Jiyana Me (Erebî) Merkezê Kulturî yê Aram Tîgranî de do bêrê mojnayene. 8ê tebaxe de Kampa Multecîyan a Newroze de, 9ê tebaxe de Merkezê Kulturî yê Parqînî de kayê tîyatroyî, 12ê tebaxe de kayê Çûk û Pîrê, Ziman, Şengê û Pengê, Daweta Nok û Nîskan Merkezê Kulturî yê Mihemed Şêxoyî de do bêrê mojnayene. Aktîvîteyê Hesekê 18ê tebaxe de do bêrê mojnayene.