Ferhat Tunç vizêr şan semedê konserê serra hunerî ya 40. bajarê  Stuttgartî yê Almanya de bi. Konsero ke Kulturhaus Arena de ame organîzekerdene Serekê Parlamentoyê Baden Wurtenbergî Muhterem Aras zî tewrê ci bi.

Tunçî qiseykerdişê xo de  bale ante polîtîkaya hêrişkare ya Erdoganî ser û vat: '' No şer ê şaranê Tirkîya nîyo, şerê qesre yo. Bi nê şerî wazenê ke emrê xo bikerê derg. Bedelê nê şerî şaro neçar dano. Coka m sey  tim ewro zî vera şerê îşxalî yê vera Sûrîye yê.'' Tunçî dima ra eserê xo yê ke yenê naskerdene têdima vatî û goştarîkerdoxanê rê  şewa ke do nêro vîrakerdene daye ciwîyayene.

Fînalê konserî de hunermend Mîkaîl Aslan vejîya sehne û deyîrê xo yê kirmanckî vatî. Dima ra Ferhat Tunç û hozano dêrsimij Mehmet Çapan zî vejîyayî sehne û hîrê hunermendanê dêrsimijan pîya deyîrê Dêrsimî vatî.

Konser de qiseykerdişê Selahattin Demîrtaşî yê konserê serra hunerî ya 30. yê Tunçî yo ke Îzmîr de amebi kerdene sey sînevîzyon ame ramotene û reyna mesajê Demîrtaşî ame wendene. Demîrtaşî mesajê xo de bale ante ke vera zulmî zîndan, surgun  û teber de têkoşîno biheybet yeno domnayene û vat ma her roje şefeqê azadîye rê hîna bênê nizdî. Dermîrtaşî şexsê Tunçî de heme hunermendê kurdanê ke vera zextanê giranan ê vera ziwan û kulturê kurdan têkoşîn kenê rê silam û heskerdişê xo şawit û wina qedîna: 'Bi hêviyên rojên azad, silavên germ. Serkeftin.'