Têgêrayîşê Kulturî yê Cinîyan Kevana Zêrîne yaroje Herêmanê Pawitişî yê Medya de konferansê xo yo 2. kerd. Tewrbîyayoxanê konferansî vat ê do warê huner û kulturî de têkoşînê xo xurtêr bikerê.

Jînda Efrîn: ''Ma konferansê xo yo verên 2016 de kerdbi. Ma konferansê xo yo dîyin pê slogana 'Ma do pê şerê şarî yê şorişgêrî şorişê kulturkî bikerê' kerd. Ma wazenê ke kulturê xo newe ra ganî bikerê. Konferans de muneqeşeyê hîrayî ameyî kerdene. Ma persê raştîye şerî de ma senî eşkenê zafêr wayîrê kulturê xo vejîyê ser o vindertî. Dişmen wazeno vera şaran qirkerdişê kulturkî bikero. Xora şerê dinya yê hîrêyînî nê esasî ser o yeno rayraberdene. Ma cehd kenê ke vera nê hêrişan şorişê kulturkî bikerê. Ma wazenê kulturê Toros û Zagrosan reyna ganî bikerê. Coka ganî ma heme cinîyê Rojhilatê Mîyanênî binê serbanê Kevana Zêrînî de bêrê têhet.''

Pelşîne Munzur: ''Pê nê konferansî ma de ruhêko dahîna pîl yê têkoşîn û xoverdayîşî ame afernayene. Ma do zafêr qerardar semedê hedefena xo têkoşîn bikerê. Konferans  de her hetî ra rewşa Kurdîstanî ameye destgirewtene û analîz û ercnayîşî muhîmî ameyî kerdene.  Dişmen Kurdîstan de her wextî ra zafêr hêrişê kultur û hunerê kurdan keno. Vera naye wezîfeyê Koma Amara oyo he vera hêrişan bibo cewab û sey cinîyan esarenê şorişgêran biafernê. Ma sey Koma Amara veng danê heme cinîyan kurdîstanijan ke wayîrê muzîkê şorişgêrî vejîyê. Ma xoverdayîşê hemrayanê xo yê Zap, Metîna, Avaşîn û waranê bînan selam kenê. Ma zî do warê kultur hunerî de têkoşînê xo pîlêr bikerê.''

Sarya Karakoçan: ''Ma konferansêko zaf muhîm kerd. Konferans de derheqê huner û kulturî de ercnayîşê hîrayî ameyî kerdene û qerarê muhîmî ameyî girewtene. Ez pê bawer a ke nê qerarê do bêrê caardene û destkewteyan zî xo ya bîyarî.''

Arîne Serhad: ''Tewrbîyayoxanê konferansî de heyecan û coşo pîl bibi. Nê tesîrê konferansî zî kerd. Wexto winayêno ke vera cinîyan şîdet zêdîyayo de kerdişê konferansî zaf muhîm o. Modernîteya kapîtalîste heme îmkananê xo semedê qirkerdişê kulturkî şuxulnena. Cinîyan ê azadwaştoxan û şorişgêran vera nê qirkerdişê kulturkî konferansêk kerd. Ma nê konferansî de dî ke zaf averşîyayîşî bîyî. Reyna ma dî ke waranê azadîye de xebatê kultur û hunerî senî bimbarek û muhîm ê.''

Gulîstane Efrîn: ''Waştişê ma oyo ke pîya bi cinîyan ê ereb, suryanî, çekes û tirkmenan bi veng û vateyê cinîyan hunerêkê hemparî aver bêrê.''

Sema Kobanê: ''Konferansê ma de netîceyê muhîmî vejîyayî. Kevana Zêrîn têna semedê cinîyan ê kurdan nê semedê heme cinîyan ame ronayene. Aye ra seba ke xebatê xurtî bêrê kerdene ma no konferansê dîyinî kerd.'2

Nêrgîze Qamişlo: ''Ez zaf keyfweş a ke tewrê nê konferansî bîya. Xeylêk babetê muhîmî ameyî ercnayene. Bitaybetî derheqê kultur, huner û edebîyatî de munaqeşeyî ameyî kerdene. Edebîyatê Kurdîstanî tarîxî ra sey fekkî resa roja ma. Ewro ra tepîya ganî ma edabîyatê nuştekîyî zî aver bêro. Cinîyî ganî xo ra bawer bikerê, wayîrê kulturê xo vejîyê, bi tîyatro, şîîre û sînema kulturê xo bidê ciwîyayene.''