Baroyê Amedî  kombîyayîşê çapemenî viraşt û derheqê grevê vêşanîye de zanayîş da. Serekê Baroyî Cîhan Aydinî ya pîya xeylê îdarekarê baroyî û avûkatî tewrê  kombîyayîşî bîyî.

REWŞA GUVENE GIRAN A

Aydinî nê vatî: ‘‘Zîyaretê ma yê 30 Kanûne de bi sebebo ke rewşa Guvene giran o, nêvejîyaye pêdîyayîşî. Goreyê zanayîşo ke ma embazanê ci ra girewt rewşê Guvene xirab bîyo. Hinî nêeşkena wirzê lingan ser û qisey bikere. Zaf zehmetîye ancena. Roja 57ine yê girevî de Guvene kewta merheleya krîtîke.‘‘

GREVÊ VÊŞANÎYE VILA BENO

Aydinî bale ante ke grevê vêşanîye ke  rayberîya Guvene de bi  waştişê wedartişê tecrîdê serê Rayberê Şarê Kurdî Abdullah Ocalanî ame destpêkerdene,  zîndanan de vila beno û vat ke heqê tepişteyan yenî binpaykerdene.  Çîyê sey awe, şeker, sol û vîtamînî  zaf kêmî dîyenê tepişteyan.

WA OCALANÎ DIR PÊDÎYAYÎŞ BÊRO VIRAŞTENE

Serekê Baroyî Cîhan Aydinî vist vîrî ke Ocalanî ya pîya hîrê tepişteyê bînî ke Îmrali de yê ê zî merdiman û avukatanê xo nêvînenî, waşt ke cade pêdîyayîşî bêrî viraştene û va:‘‘ Ganî sere de Wezîrîya Edaletî heme dezgehê eleqedarî yê neteweyî û Mîyanneteweyî seba naye  têbîgerî.‘‘