Seba tecrîdo ke Rayberê Şarê Kurdî Abdullah Ocalanî ser o yeno domnayene wedarîyo û seba weşîye, azadîye û ewlehîya ey çalakîyê vêşanîye dewam kenê. Çalakwanan ser îşkence û tedayê îdareyanê hepisxaneyî zî xeberan ra kemî nêbenê. Hepisxaneyê Duzce yê Tîpê Tyî de, hepisî Ahmet Akbalikî pêvînayîşê keyeyê xo de va ma rê îşkence yeno kerdene û waşt ke no derheq de gerre bêro kerdene.

Pîyê Ahmet Akbalikî, Mehmet Selîm Akbalikî no derheq de beyanat da ANFyî û îzah kerd ke lajê ey verî  dest bi grevê vêşanîye yê bêdem-bidore kerdo la 5ê Çile ra dima açarnayo bêdem-bêdore.

DELÎLÊ ÎŞKENCEYÎ

Qaso ke Mehmet Selîm Akbalik vano, wexto ke lajê xo dîyo, lajê ey Ahmet Akbalikî qalê îşkence û muameleyê xirabî  kerdo. Akbalikî wina qiseyî kerd: “Wexto ke ma yenîme têhet, seba ke ma xemgîn mebîme ma ra nêvano la ma baş zanîme ke senî zulim înan rê yeno kerdene. Wexto ke ma şîme pêvînayîşê akerdeyî, ma bedenê ey de delîlê îşkenceyî dîyî. Goşê Ahmetî pîşte bî. Ê embazê ey zî hermeyê xo pîşte bî. Naye ser înan gerre kerdo la gerreyê xo nêameyo qebulkerdene û îdareyî derheqê înan de gerre kerdo.“

'EZ QERARDARÎYA EY RÊ HURMET KENA‘

Akbalikî waşt ke wa her kes paştdarîye bido çalakîya girewteyan û wina dewam kerd;“ Eka şaro Kurd ke  mebo yew, pêroyê girewteyî zîndanan de yenê qetilkerdene. Girewteyî pêvînayîşê Mehmet Ocalanî ya Îmraliyî ra zaf îqna nêbîyê ke qerarê domnayîşê grevî girewto. Ez wazena ke no zulim êdî biqedîyo.“

Dîlek Akbalike ya waya Ahmetî zî qaso ke vana birayê xo de bi telefon qisey kerdo û wina qisey kerd: “Birayê mi va ma 4 kesî grevê vêşanîye de yîme. Xora ê yewbînan ra visnayê. Qaso ke va înan yew embazê înan o ke cezaya muebetî girewta eşto hucre. Ma vanîme êdî bes o.“

 ‘TAVILÎ HAŞTÎYE’

Veyva Ahmet Akbalikî Sakîne Akbalike zî no derheq de wina qisey kerd: “Ma wazenîme ke her kes sey yewbînî biciwîyo. Bi des serran cezayî dîyenê bi domananê ma. Ma çi sucê domanê ma esto, înan çi suc kerd? Domanê ma her çiqas îşkence bêro kerdene zî ma ra nêvanê. Wexto ke ma şonîme pêvînayîş ma rê zî muameleyo xirab yeno kerdene, ma kenê rût û zereyê porê ma zî sehnenê. La seba ke domanê ma xemgîn mebê, ma înan ra qalê nê îşkenceyan nêkenîme.“