Dewaya Licê ya ke vizêr Îzmîr de ameye viraştene versûcê dewaya Licê yo tek Eşref Hatîpogluyî berat kerd.

Qezaya Licê ya Amedî de 23ê Teşrîna verêne 1993 de dimayê bi hawayêkê bigumanî kişîyayîşê fermandarê Cendirmeya Herême tuxgeneral Bahtîyar Aydinî netîceyê hêrişanê polîs û leşkeran de 16 sivîlan cuya xo vîndî kerdebî, 36 kesî zî birîndar bîbî. Dewaya ê qewimîyayîşan a roniştişê 14. Mehkemeya Cezaya Girane ya Îzmîrî de amî dîyene. Versûco dewa yo tek serhengo teqawid Eşref Hatîpoglu mendo. Roniştişî de serekê Baroya Amedî Cîhan Aydin serê meseleyê hewilnayîşê dewa Amed ra bi Eskîşehîrî û ûca ra zî bi Îzmîrî ser o vindert. Avûkat Yunus Muratakan zî prosesê dewa de xîlafan ser o vindert.

Dima ra serekê Baroya Îzmîrî Ozkan Yucelî zî ard ziwan ke mutala de bi tu hawayêk beyananê şahidan rê ca nêdîyayo. Avûkat Sîdar Avşarî zî vat: “Sere de seba merdeyan û merdimanê înan nê qewimîyayîşan ra dima mexdurîyetêko pîl virazîyayo, bi hezaran keyeyan Licê ra koç kerdo. Eşref Hatîpoglu bi serreyê xo zereyê JÎTEMî de organîzasyonêk o. Bêhûmare kiştişê ê estê, kiştişê bi hezaran merdiman ra mesuldar o. Kesêko winayên ganî nêro beratkerdene. Ma wazenê ke versûc bêro cezakerdene.”

Avûkat Kezban Yilmaze zî persa û vat: “Eke sekê ê îdîa kenê Licê de nê qewimîyayîşî hemverê organîzasyonî de yê çira mîyanê kişte yan zî birîndaran de endamêkê organîzasyonî çinyo. Sûco ke hetê versûcî ra ameyo kerdene raşte de yo û ma seba ê ceza wazenê.”   

Avûkat Halîl Donmezî zî ard ziwan ke heyetê mehkema dosya nêwenda, eke biwendêne wina nizd nêbîyêne.

Avûkatanê Eşref Hatîpogluyî zî vat ê beyananê nê avûkatan qebûl nêkenê. Dimayê dayîşê mabênêk ra heyetê mehkema seba versûcê dewaya Licê serhengo teqawid Eşref Hatîpogluyî qerarê beratî da.