Newela Çapakçûrî cayanê zergûninan yê Çewlîgî ra yo tewr muhîm o. Wextê her vîjnayîşî de beno rojeve û sîyasetmedarî sey projeyêko sereke genê dest. La heta ewro qet sozo ke dîyayo, nêameyo ca. Şaredarîya AKPyî ya Çewlîgî bêxera medyaya sosyale de reklamkerdişî, çîyêk nêkerda. Şaredarîye tena pê nê projeyan xo wasifnena û raştîye de semedê şarî tiway nêkena.

Bi serran o Şaredarîya Çewlîgî semedê wayîrvejîyayîşê Newala Çapakçûrî sozan dana, keyepelê xo de reklamê ci kena, la sozê xo nêana ca. 2014î ra heta ewro Şaredarê Çewlîgî Yucel Barakazî her serre sozê xo keno newe û şarî xapîneno, la raştî de qet gaman nêerzeno.

Şaredarîye bi serran o vana ke Newala Çapakçûrî cayo tewr erjaye yê Çewlîgî ya û ê seba pawitişê nê cayî, sey cayê komel û kulturî kenê parkêk û seba ke şar ci ra feyde bîvîno, xeylê tesîsan virazenê la çîyêk nîno kerdene. Sey xeylê çîyanê bînan no vatişê şaredarîye zî tena qal de maneno.

Xeylê projeyê bînî ke şaredarîya AKPyî sozê ci dana û reklamê ci kena, la nêvirazena estî. Tayê ci wina yî: Meydanî, kafeyî, bexçeyê hobîyan, cayê daristanîye, cayê estoran, parkî, banê kulturî, tesîsê sporî, bexçeyê fêkî û xeylê çîyê bînî. Heta ewro şaredarîye seba nê çîyan soz daya û keyepelê xo de pare kerda, la ti xebate nêbîya.