Rêxistina HDPyî ya Çewlîgî  vizêr 'Şayîya Azadîye, Demokrasî û Edaletî' serûber kerde. Serekwekîla Gruba HDPyî Merale Daniş Beştaş, Wekîlê HDPyî yê Çewlîgî Erdal Aydemîr û xeylêk endamê HDPyî tewrê kombîyayîşî bîyî. 

Şayîye pê deyîranê hunermende Ayfere Duzdaş dest pêkerde. Dima zî Erdal Aydemîrî qisey kerd. Aydemîrî Tahîr Elçî yad kerd û da zanayene ke sey Îdrîs Baluken û Selahattîn Demîrtaş bi hezaran sîyasetmedarê HDPyî bi hawayêkê bêhuqûqî zîndanan de tepişîyenê. 

Merale Daniş Beştaş îfade kerd ke zîndanan de bi taybetî Zîndanê Îmraliyî de vera tepişteyan polîtîkayê giranî yenê caardene û vat: ''Tecrîd resmê bêedaletîye, bêhuqûqîye û polîtîkaya şerî yo. Destûr nêdîyeno ke Birêz Ocalan keye û avûkatanê xo bivîno. Ê nêwazenê Ocalan qisey bikero çunke zanenê ke key o qisey bikero haştîye bena.''

Beştaşe dewaya qefilnayîşê HDPyî viste vîrî û vat: ''Ê bêar vanê 'ma meseleya kurdan çareser kerda.' Hema zî kesê ke kurdkî qisey kenê tepişîyenê, tabelayê kurdkî wedarîyenê. Şarê ma sindoqan de do cewabê îqtîdarî bido.''

Peynîya şayîye de hunermend Kadîr Çat vejîya sehne ser.