Fermandaranê Qerargehê Merkezê Pawitişê Şarî  ra Zozane Çewlîga ANFyî rê qisey kerd, nê vatî:

''Xora HPGyî derheqê qewimîyayîşê Garê de eşkerayîye daye. La wextêko tay selahîyetdarê hukmatê Başûrî bi eşkerayîyanê xo operasyonê vera waranê gerîlayan xelet ane ziwan. Coka ma  sey Merkezê Pawitişê Şarî derheqê nê hedîse de û ewro ra tepîya do tewirê ma  senî bo de reyna eşkerayîye danê.

Operasyon di perran ra ame kerdene

Hedîse wina qewimîya: 4ê teşrîna peyêne, saete 11:00  de hêzanê PDKyî vera Koyê Garê yê herêma Çemanke ya Duhokî di perran ra operasyon da destpêkerdene. Perre verêne xeta Çemanke ra verê xo da Garê û perre diyîne xeta Etûşî ra ver bi Gelîya Qîyametê ke sey Qilê Aslanî zî yeno zanayene dest pê operasyonî kerd. 

Her di perran a nuqtayê gerîlayan ameyî hedefgirewtene. Rixmo ke şarê herême û hêzê PDKyî zanê nê cayê gerîlayanê wina cehdkerdişêk ame kerdene. Na babete de gerîla û PKKyî sûcdar kenê la heqîqat no nîyo. Hêzê ke eşt waranê gerîlayan ser, hêzê operasyonî bi. Hêzê ma yê herême sere de înan hîşyar kenê. Ma raşta zî nêwazenê vera pêşmergeyan pêkewtiş bikerê. Coka heme hêzê ma yê pawitişî bi hesasîyet nizdî benê. La rixmê hîşyarîye hêzê operasyonî heta zereyê nuqtaya gerîlayan yenê.

Temasî 4-5 deqa kerd derg

Nê semedî ra gerîla mecbur maneno ke xo bipawo. Temas 4-5 deqa kerd derg. Seba ke kewtê warê gerîlayan mayîno ke verî ra semedê pawitişî ame cakerdene, ame teqnayene. Seba ke pêkewtiş mevejîyo Merkezê Qerargehî yê kewt dewre û verê pêkwtişî gerîya. Nika tay selahîyetdarê hukmatî sey tim narey zî raştîye nimnenê û PKKyî sucdar kenê. 

Bêşik o ke ma semedê nê hedîseyî dej ancanê. Ma nêwezanê xetayê ke tarîxî de bîyî reyna bêrê ciwîyayene. Senî ke heme şarê û rayapêroyî zî zano ma sey PKK çirey nizdê şerê zereyî nêbîyê. Nê prosesî de şar û Rayberê ma ver bi tehlukeyan de yê û dewleta tirk a faşîste wazena kurdan qir bikero. Sere de Rayberîya ma, têgêrayîşê ma Merkezê Qerargehî veng da ke wa çîyê ke verî bîyî reyna mebê. Dem demê yewbîyayîş o.

Gerîla vera îmhayê şarê kurdî ame raameyene

Tay hêzê vera Rayberê Şarê Kurdî, şarê kurdî û têgêrayîşê azadîye komplo rayra benê. Semedê îmhakerdişê Rayberîye û gerîlayan ê ke xeta pawitişê netewe ya kurd û Kurdîstanî pawenê, tay hêzanê kurdan zî genê kişta xo. Verê nê hedîseyî fermandarê Merkezê Pawitişê Şarî veng da Mesûd Barzanî û PDKyî. Înan ra xeylêk rey ame waştene ke wa plankê qirkerdişê kurdan de ca nêgerê. Dewleta tirka ke Başûr de xeylêk cayî îşxal kerdî û tewr peynî de kewt Heftanîn hukmatê herême û PDKyî heta anika vera ci nêvejîyayî. Ê zî bi xo konseptê îmha de ca genê. Ganî hukmatê herême hînî plananê qirkerdişî yê dewelta tirke de ca nêgero.

Eke heta nika şerê zereyî nêqewimîyo, no tewirê ma ra yo

Tay hedîseyê provokekerdişî qewimîyayî û ama vatene ke PKK hêriş keno.  PKKyî qet hêrişê çewî/e nêkerd. Pêşmergeyan rê hêriş nêbi. Tay cayan de provokasyon vejenê ke wa pêkewtişî dest pê bikerê. Sere de Tirkîya xeylêk hêzê naye wazenê.  Zînî Werte, Xakurkê, Şeladize û Amedîye de tay cehdkerdişî qewimiyayî. Eke heta nika şerê zereyî nêqewimîyo, no tewirê ma ra yo. Şerê zereyî ya feydeyê ma çîn o. Hukmatê herême na rewşe hîna keno tuj û sucî erzeno milê PKKyî ser.

Vera nuqtayanê gerîlayan hêriş, operasyon ame kerdene

Wa no hol bêro zanayene ke wexto ke DAÎŞî hêriş Mexmûrî kerd eke gerîlayan mudaxale nêkerdêne DAÎŞî heta Duhok û Barzanî şinî. Cayo ke vanê PKKyî hêriş kerd nuqtaya gerîlayan esta. Şarê Çemanke zî zano. Ganî şarê Başûrî nê kayan rê mexapîyo. Sere de pêşmerge û şarê Kurdîstanî ganî heme şarê kudî bizano ke gerîlayan rê operasyon û hêriş ame kerdene.

Ma têna yew leteyê Kurdîstanî nêpawenê

Wa no rind bêro fehmkerdene ke ma têna leteyêkê Kurdîstanî nêpawenê.  Ma semedê pawitişê şar û welatê xo têkoşîn kenê. Ma vera heme hêrişanê vera ercan û welatê xo vejîyenê. Ewro  ra tepîya zî planê ma yê hêrişê vera pêşmergeyan û hêzanê Başûrî çîn o. Ma xo sey hêzê pawitişê nê şarî vînenê. Ma hêvî kenê hukmatê herême nê hedîseyî ra netîce veto û tewirê xo bedilneno. PDK nika semedê operasyonî hêzanê taybetan nano ro. Eke nê hêzê hêrişê nuqtayanê ma bikerê ma do bêveng mevindê. Ewro ra tepîya heme operasyonan ra Barzanî berpirsîyar o. Eke mabênê gerîlayan û pêşmergeyan, PDK û PKKyî de şer vejîyo, berpirsîyarê nê PKK nîyo.