Fermandara Qerargehê Merkezî yê YJA-Starî Zozane Çewlik cewab da persanê ANFyî û têkoşînê 2021î ercna. Qiseykerdişê Zozane Çewlik ra beşo verên wina yo:

''Ez verî Rayber Apoyî bi hesrete selam kena, şexsê embazanê ma yê çêran Şoreş Beytuşşebap, Serhat Giravî, Sarya Diyar, Nûjîne Koçer, Nûjîn Êrs, Botan Başkale, Cûmalî Çorûm, Diljîne Marya, Sosine Efrîn, Hewreman Avyer, Rêvan, Mûnzûr, Dijwar, Apê Yûsûf, Saît Yûsûf, Amargî û Şilane Goyî de pêro şehîdan bi rêzdarî yad kena.

Serra 2021î pêro dinya de bi taybetî Kurdîstan de zaf giran vîyarte. Na serre zî ame xîretkerdene de meseleya kurdan pê şîdetî bêra halkerdene û çareserîya demokratîke bêra tasfîyekerdene. Îqtîdarê AKP-MHPyî, Amerîka û NATO hema zî înkar û îmhaya têgêrayîşê azadîye de israr kenê, komployê vera Rayberîye giran kenê.

Ma pê biranê giranan dekewtbî na serre û ma zafê nê birî ardî ca. Şerwananê YJA-Starî çarçewa şerê şarî yê şorişgêrî û gerîlatîya dewrê modernî de şer kerd. Şerwanan ê cinîyan emser zî rayberîya têkoşînî kerde. Têkoşînê gerîlayan ê cinîyan xo rê averberdişê nasnameyê cinîya azade esas gêno û rêxistinîya têkoşînê cinîyan sey wezîfeyê xo vîneno.

Emser vera têgêrayîşê ma, gerîlayan, şarê ma hêrişê tewr giranî ameyî kerdene. Kurdîstan de yew ca çin o ke bombayî nêerzîyayê ser. 10ê sibate de kampa esîran a Siyanê ya Garê ameye hedefkerdene. Dewleta tirke reya verêne merkezê partîya ma kerd hedef. Rayberîya embaz Şoreş Beytuşşebabî de Garê de îqtîdar ame binkerdene. Dima 23ê nîsane de dewlete hêrişê Zagros, Zap, Metîna, Avaşîn, Basya kerd. Garê ra dima seba gerîlayan prosesêko newe dest pêkerd. 

Dişmenî vatêne qey cade Herêmanê Pawitişî yê Medya de ser bikewo. La nêeşka 7 mengan de tunelêkê şerî bivisno destî. Seba ke pê xoverdayîşê gerîlayan nêeşkayî înan dest eşt çeka kîmyewîye. Verî zî dişmenî Cûdî, Amed û Gelîya Teyarê de çeka kîmyewîye şuxilnabî. La narey înan zaf reyî çeka kîmyewîye şuxilnayî. Faşîzm tunelanê şerî yê Werxelê de bin kewt. Reyna ruho bêmexlûb ê Apogîran ame îsbatkerdene. Hêzanê ma vera hêrişan xeta Zap, Avaşîn, Gever û Xakûrkê de Hemleya Şorişgêre ya Bazanê Zagrosan, xeta Metîna û Heftanînî de Hemleya Şorişgêre ya Cengê Xabûrî dayî destpêkerdene. Tewr peyêne teşrîna peyêne û kanûne de Heftanîn, Zap û Serhed de çalakîyanê bi taktîkanê gerîlatîya dewrê neweyî de dişmen mat mend. 

Warê Vakurê Kurdîstanî de zî dişmenî bi nameyê 'Erenî' xeylêk operasyonî dayî destpêkerdene. Bi taybetî eyaletê Dêrsimî de nê operasyonî ameyî pûçkerdene. Ma eşkenê vajê ke Dêrsim de zî çeka kîmyewîye şuxilîyaya. Şingal û Mexmûr de embazê ma yê rayberî Sosin Afrin, Rênas Rojhilat, Sait Yusuf, Apê Yusuf û Merwan Bedel ameyî hedefkerdene. Dewleta tirke seba ke binkewtişê xo binimna beno ke bi hawayêkê barbarî hêrişê welatperweran bikera. Coka wa her kes hayîya xo bo. Şarê ma zî wa ney bivîno û rêxistinîya xo xurtêr bikero.

Hemleya 'Vera qirkerdişê cinîyan wext wextê pawitişê cinîya azade û komelî yo' serrêke xo pey de verdaye. Hêzê ma yê YJA-Starî zî pê çalakîyanê xo tewrê na hemle bîyî. Ganî têkoşînê cinîyan hedefanê hemparan ser o yew bibo û îradeyê xo xurtêr bikero. Çunke pêro hêrişî şexsê cinîyan de yenê kerdene. Cinîyî her cayê dinya de bêîrade yenê verdayene. Gulîstane Doku, Ozgecane, Denîze Poyraz, Îpeke Er, Pinare Gultekîn qurbanê şîdetê camêrd-dewlete yê. Emser têkoşînê cinîyan rêxistinîya xo zaf aver berda. 

Kurdîstan de têkoşînê ma yê azadîya cinîyan û gerîlatîya cinîya azade de qewimîyayîşê girîngî qewimîyayî. Cinîyan pêro safhayanê ma yê têkoşînî de bi aktîfî ca girewt. Ma sey YJA-Starî her hetê têkoşînê cinîyan girewt rojdemê xo û aver berd. Ma hedef kerd ke meseleyê komelkî yê cinîyan zêdêr bigêrê destî û çareser bikerê, pê rojdemanê taybetan çalakîyanê gerîlayan aver berê û verê qirkerdişê cinîyan hedef bikerê. Ma hê serra 2022î pêşwazî kenê. Ma destkewteyanê xo de hîna hêvîdar û ganî yê, çareserîya meseleyan de hîna têkoşer, isrardar û qerardar ê. Nê hetî ra serra 2022î do biba serrêka biîdîa, aktîf.

Dewleta tirke ya kolonyalîste ronayîşê partîya ma ra nata vana ke ê hê ma qedînenê. Înan zûrê xo hende dibare kerdî ke hînî pê bawer kerd. Înan vatbi ke zimistanê 2021î do bibo zimistano peyên ê PKKyî. La netîceya şerê gerîlayan de îqtîdarê AKP-MHPyî dekewt zimistanê xo yê peyênî. Înanê ke waştêne peynîya PKKyî bîyarê peynîya xo arda.

Hêzêko tersnek pêro îmkan û metodan şuxilnena. Tewr zaf emser vera gerîlayan çeka kîmyewîye şuxilîyaye. Nê hêrişê kîmyewîyî namerdî yê. Ma zaf reyî venga OPCWyî, venga rayaumûmîya mîyanneteweyîye daye ke bêrê cigêrayîşan bikerê. Xoverdayîşê gerîlayan dişmen kerd gêj. Ma nê hukmatê faşîstî ra hêrişanê hîna giranan pawenê. Vera nê hêrişan tek wezîfeyê gerîlayan xoverdayîş o.''