Mektebê kurdkî, kreşî û aktîvîteyê kulturkî yê ke hetê şaredarîyanê HDPyî ra ameyî kerdene, hetê qeyûman ra ameyî wedartene ke 2016 û 2019 de ameyî tayînkerdene.

Wan de bado ke şaredarîye de qeyûm ame cakerdene ke nameyê kreşê kurdkî yê Perpêrokî bedilîya û herinda kurdkî de dersa tirkî dest pêkerd. Perwerdekara kurde Hamdîye Çîftçî Oksuza ke Perpêrok de xebityayêne, karî ra ameyî vetene.

Çîftçî vat: ''Qeyûman verî kurdkî hedef girewt, verî dezgehê ziwanê kurdkî ameyî qefilnayene.  Mi kreşê kurdkî de mamosteyîye kerdêne. Kreş de 80 domanî bibî û ziwan bi temamî kurdkî bi. Kreşo ke bi waştişê şarê herême ame akerdene hetê qeyûman ra ame qefilnayene. Verî tabeleya kurdî ameye wardayene, ziwanê perwerdeyî yo kurdkî açarîya tirkî, mamosteyê kurdkî karî ra ameyî vetene. No zî mojneno ke senî kurdkî ra tersenê.''