Wextê qeyûman de xeylêk kesî bi torpîlî sey karkeran gêrîyabî şaredarîyan. Weçînayîşanê 31ê adare ra dima Hemşaredaranê Wan û Rêya Armûşî nê kesî karî ra vetî. Hukmat binê nameyê ''qirkerdişê karkeran'' de çalakî û rayraşîyayîşanê provakatîfan keno. 

Serekê Şubeyê Wanî yê HAK-ÎŞî û Hîzmet-ÎŞî Fatîh Akdenîzo ke bi îdîaya Hemşaredarê DEM Partî karkeran karî ra vejenê şarî provake keno, eşkera bi ke laj û merdimê xo girewtê karî.

Akdenîzî verê Şaredarîya Rêya Armûşî ya DEM Partî de xeyme akerde ke verê cû zî ey paştî dabî çalakîyanê roniştişî yê verê bînayanê HDPyî.

Lajê Akdenîzî Eray Akdenîz zî karî ra ame vetene. Kekê ey, mêrdeyê waya ey, dezayê ey û waya ey zî bi torpîlî Şaredarîya Rêya Armûşî de bibî personel. 

Hetê bînî ra Hetkarê Serekê HAK ÎŞî  Veysel Guven waya xo, îdarekarê HAK-ÎŞî Alî Guven dezayê xo girewtî karî. Îdarekaranê HAK-ÎŞî ra Metîn Sevînçî zî birayê xo Omer Sevînçî girewtbi karî.