Îtîfaqê Demokrasî û Azadîye yê Kurdan deklarasyonê xo yê weçînayîşî de îfade kerd ke verê kurdan de firsend û rîskê pîlî est ê. Îtîfaqê venga pêro kurdan da ke dormeyê Partîya Çepe ya Hewze de bêrê têhet.
Îtîfaqê Demokrasî û Azadîye yê Kurdan deklarasyonê xo yê weçînayîşî qezaya Pêyasî ya Amedî de bi kombîyayîşêkî eşkera kerd.
Hemserekê KCDyî Berdan Ozturk, Hemserekê DBPyî Salîha Aydenîz û Keskîn Bayindir, Hemvervatoxa Partîya Çepe ya Hewze Çîgdeme Kiliçgun Uçar, Hemserekê HDPyî Mîthat Sancar, Serekê Partîya Azadîye Ayetullah Aşîtî, Serekê Partîya Azadîye û Merdiman (PÎA) Mehmet Kamaç, Serekê Partîya Komunîste ya Kurdîstanî Sînan Çîftyurek û Serekê Partîya Sosyalîste ya Kurdîstanî (PSK) Bayram Bozyel tewrê kombîyayîşî bîyî.
Deklarasyon de verî bale ameye antene Erdlerzê 6ê Sibate ser û ame îfadekerdene de erdlerz de dewlete erkê xo nêardê ca û peygoşîya dewlete ra qetlîyamêk qewimîyayo.
Deklarasyon de ame parekerdene ke nê prosesê weçînayîşî de polîtîkayê înkar û îmha yê vera kurdan bi hawayêkê tewr giranî dewam kenê û şerê vera kurdan bîyo sebebê krîzanê Tirkîya zî. Deklarasyon de ame vatene ke weçînayîşê 14ê Gulane seba çareserîya meseleya kurdan firsendêk o la ganî Îtîfaqê Miletî seba paştdayîşê kurdan hêverî cewab bido waştişanê kurdan zî. Deklarasyon de ame îfadekerdene ke Îtîfaqê Demokrasî û Azadîye yê Kurdan wazeno ke heq û waştişê kurdan wa bêrê caardene, berê çareserîya meseleya kurdan bêro akerdene.
Deklarasyon de bira 'têkoşînê hemparî' ameye îlankerdene û sebebê nê têkoşînê hemparî wina ameyî rêzkerdene:
''-Ganî nasname û estbîyayîşê kurdan bişinasîyê û qanûnan de cabidîyê înan.
-Kurdkî ganî dibistanan ra heta zanîngehan warê perwerdeyî de bibo ziwanê perwerdeyî û ziwano resmî.
-Ganî kurdî bieşkê pê nameyanê xo û nasnameyê xo rêxistin bibê û xo îfade bikerê.
-Ganî kurdî Kurdîstan de bibê wayîrê statuyê xoîdarekerdişî.
-Ganî nameyê ê cayanê ke ameyê vurnayene apey bêrê dayene.
-Gorê kesayetanê kurdan ê tarîxîyan wa bêrê eşkerakerdene.
-Qanûno Bingeyî goreyê têdûştîye ganî newe ra bêro viraştene.''
Deklarasyon de wina ame vatene: ''Îtîfaqê ma vera qeyûman têkoşînê xo rê do dewam bikero. Îtîfaqê ma xoverdayîşê Jin, Jiyan, Azadî yê cinîyan ê kurdan selam keno. Îtîfaqê ma teda û înkarê vera kurd, ereb, armenî, asûrî, azerî û tirkmenî û teda û înkarê vera elewî, sunî, êzidî, xirîstîyan û musewîyan zî red keno. Îtîfaqê ma wazeno wa tecrîdê vera Birêz Ocalanî bêro wedaritene. Îtîfaqê ma wayîrê destkewteyanê şarê ma vejîyeno.
Îtîfaqê ma venga şarê ma dano ke dormeyê Partîya Çepe ya Hewze de bêro pêser û 14ê gulane de raya xo bido ci. Serkewtişê ma yê weçînayîşî do bibo bingeyê xîretê ma yê seba yewîya neteweyîye. Ma do pîya têkoşîn bikerê û ser bikewê. Yewîya kurdan azadîya kurdan a.''
