Endamê Konseya Rayberdişî ya KCKyî Cafer Şervanî cewab da persanê ANFyî û rojdem ercna. Qiseykerdişê Şervanî ra beşêk wina yo: 

''Hemleya ma ya 'Wextê Azadîye' destkewteyê pîlî 2021 de vistî destî. Her çî ra verî Serkewtişê Garê metodê şerî yê dewrê neweyî vetî werte. Dewleta tirke ya faşîste dima vera Metîna, Zap û Avaşînî operasyonê îşxalî da destpêkerdene û gerîlayan vera ney xoverdayîşêko pîl vet werte. Emser xoverdayîşê şarê ma û gerîlayah de azadîya Rayberîye bîya rojdemo tewr girîng. 

Gerîlayan Zendûra, Werxelê û Girê Sorî de vera teknîk û çekanê dişmenî şerê tunelan kerd. Avaşîn de netîceya xoverdayîşê gerîlayan de dişmen neçare mend de xo apey bianco. Na serra newîye ya têkoşînî de ma do pê Hemleya Wextê Azadîye serkewtişanê pîlan bîyarê ca. Na serre do biba serra rijîyayîşê AKP-MHPyî û rijîyayîşê rejîmê Îmraliyî. Xoverdayîşê gerîlayan, şarê kurdî, cinî û ciwananê ma bi Hemleya Wextê Azadîye zor da dewleta tirke. Ganî Rojawan de zî asta tewr berze de hemle bêra rêxistinkerdene. Xora Rojawan de xopawitiş asta tewr avere de yeno kerdene.

Erdogan û hukmatê ci semedo ke verê rijîyayîşê xo bigêrê hêrişê Rojawanî kenê. Ganî hêzê Rojawanî goreyê ney amadekarîya xo bikerê û cewabê tewr raştikênî bidê hêrişanê dewleta tirke. Pê nê hêrişan peynîya AKP-MHPyî do bêra. Dewleta tirke û PDK pîya têgêrenê û wazenê rewşa kaose ya Iraqî ra fayde bivînê. Dewleta tirke û PDK wazenê Şingal û Mexmûrî ser o hukm bikerê, êzidîyan rê Peymana 9ê Teşrîna verêne bidê qebulkerdene. 

Serra 44. ya ronayîşê partîya ma de xoverdayîş û çalakîyê hemle yê gerîlayan do morê xo bidê binê prosesî. Girîng o ke şarê ma û çar parçeyê Kurdîstanî bi aktîfî tewrê Hemleya Azadîye bibê. Îqtîdarê AKP-MHPyî pêro îmkanê xo vera kurdan seferberd kerdo. Heta ke rejîmo faşîst ê AKP-MHPyî yo ke îqtîdarê xo qirkerdişê kurdan ser o awan kerdo nêro rijnayene kurdî azad nêbenê û rehet nêbenê. Pê rijîyayîşê AKP-MHPyî têna kurdî nê pêro şarê Rojhelatê Mîyanênî do bixelisê. 

Seba rijîyayîşê nê îqtîdarî, rejîmê tecrîdî yê vera Rayberîye û seba qedînayîşê hêrişanê qirkeran ganî şarê ma çalakîyanê xo bizêdînê. Ma hê prosesê zaf hesasî ra derbaz benê. Semedo ke ma krîzan ra vejîyê tek mefteyê çareserîye Rayber Apo yo. Ma do pê têkoşînê xo azadîya Rayberîye bîyarê ca. Na babete de mesuldarî û wezîfe kewenê milê her kesî ke her ca de xo rêxistin bikero, çalakîyan bikero. Ganî merkezê xebatanê ma yê komelkîyan û têgêrayîşî de azadîya Rayber Apoyî bibo.''