Hêrişê vera Şingalî rojanê peyênan de zêdîyayî. 7ê kanûne de hêrişê dewleta tirke de Hemserekê Konseya Rayberdişî ya Îdareyê Xoserî yê Şingalî Merwan Bedelî şehîd bibi. Vizêr zî dewleta tirke bînaya Meclîsê Şarî yê Xanesorî daye bombayan ver.

Şarê Şingalî bêvengîya hukmatê Iraqî ya serê hêrişanê Tirkîya pê çalakîyêke protesto kerde. Çalakîye de leşkeranê Iraqî çalakîkerî dayî gulayen ver û 2 kesî birîndar kerdî ke yewa ci rojnameger a.

Goreyê agahîyan rojnamegera birîndare muxabîra Çira TVyî Nesrîne Hesen a û wedarîyaye nêweşxaneyî. Ciwanê bîn o birîndar zî Ednan Hemed o ke derheqê weşîye de agahîyêke nêameye destvistene.

Goreyê çimeyanê herêmîyan artêşa Iraqî xîret kerd ke hêzêkê pîlî yê leşkerî sewqê Sinûnî bilero coka herême de alozîye qewimîyaye.

Ciwanan vera wesayîtanê leşkerîyan ê Iraqî nêrazîbîyayîşê xo mojna û bêvengîya înan rexne kerde.