Şehadetê fermandaranê YBŞyî Sees Alî Bedel (Pîr Çeko) û Xêrî Xidir Xelef (Agir Cefrî) tesîrêko giran şarê êzîdîyan rê kerd. Şingalijî bi merasîmêkî şehîdê xo oxir kerdî û derûdorê şehîdanê xo ra biyê yew û vengdayîşê îttîfaq û yewîye dayî.

‘Ferman 9 serrî yo ke dewam keno’

Qeymeqamê Şingalî Fehed Hemîdî dîyar kerd ke fermanê 3ê tebaxe 2014î ra heta ewro 9 serrî yo ke fermano ke şarê êzîdîyan ser o yo, dewam keno û vat, ‘‘Seba çi nê fermandarê ma yenê hedefgirewtene. Çunke nêwazenê êzîdîyî xo îdare bikerê. nê fermandarê ma lajê Êzîdxane yê, herre û şerefê xo pawenê.’’

Fehed Hemîd ard vîrardene ke hema zî bi des hezaran êzidîyî nê 9 serrî yê ke kampanê Başûrê Kurdîstanî ra yê û wina dewam kerd, ‘‘Kes persê înan nêkeno, her roj çadirê înan veşenê. Ma şêrê kamca ferman do bêro ma ser. Eke dewletêke est a, gere vernîya nê hêrîşan bigîra. Senî ke fermandarêkê ma vejîyeno vernî û komelê êzîdîyan bi hêzê xo bawer beno, o yeno hedefgirewtene. Her di fermandarî zî tena kîsê keyeyê xo ra nêşîyê, kîsê şarê êzîdîyan ra zî şîyê.’’

Pîr Çeko xelekêka zincîra mêrxasîye bî

Mudurê Nehîye yê verên yê Tilezêrê Celal Xeloyî zî seba şehadetê Fermandar Pîr Çekoyî vat; ‘‘Pîr Çeko xelekêka zincîra mêrxasîya ma ra bî, estareyêk asmênî ra kewt, bêîttîfaqîya ma sebebê nê hêrîşan a, êzîdîyî yew nîyê.’’