17ê êlule de 3 fermandarê YBŞyî mîyanê yew wesayîtî de netîceya hêrişê dewleta tirke ya îşxalkere de şehîd bibî. Şehîdî Dîndar Avesta, Pîran Pîr û Çîya Feqîr Koyê Şingalî yê Serdeştî de, Goristanê Şehîd Dilşer û Şehîd Berxwedanî de bi merasîmêkê girseyî ameyî definkerdene.

Endamê Îdareyê Xoserî, fermandar û şerwanê YBŞ û YJŞyî, endamê TAJÊ û şar tewrê merasîmî bîyî. 

Nameyê Fermandarîya YBŞyî ser o Xemgîn Şengalîyî qisey kerd û ard ziwan ke ê do heta peynî rêçê şehîdan de şorê û keda şehîdan qetî xo vîr a mekerê.

Nameyê keyeyanê şehîdan ser o Hemed Bişarî îfade kerd ke êzidîyî qetî verê dewleta tirke de teslîm nêbê.

Vervatoxê Îdareyê Xoserî yê Şingalî Dexîl Îbrahîmî vat: ''Dişmen û xayînî do bin bikewê û şarê êzidîyan do ser bikewo.''

Merasîmî ra dima cenazaya Pîran Pîrî waştişê keyeyê ci ser o Goristanê Feqîran de ameye definkerdene.