Agirîyo ke hetê feqîrîye ra  rêza 5ine de ca gêno, terkê qederê xo ameyo kerdene. Serewedartişê 1926î ra dima seke Agirî bêro cezakerdene, hema zî ceza dewam kena. Tirkîya de bajaro ke tede tewr zaf betalîye est a, Agirî yo. 3 serranê peyênan de 6 hezar însanan Agirî ra bar kerdo. Sebebê ci betalî û feqêrî ya. Hema vaje Agîrî de ciwanî nêmendê. Bi zanayîş yenê teşwîqkerdene ke koç bikerê.

Xebitnayîşê tiryakî

Problemo bîn zî xebitnayîşê tîryakî yo. Bazîd ke sînorê xo Îranî rê est o, bi taybetî xebitnayîşê metafetamînî vêşî beno. No tîryako ke Îran û Afganîstanî ra yeno, her ca ra bi rehetî peyda beno. Polîs û eşkerî bi zanayîş xebitnayîşê ney rê rayîr akenê. Eşkera yo ke bi polîtîkayê dewlet o. Problemo bîn zî kiştişê cinîyan o. Agirî de tena 6 aşmanê peyênan de 7 cinîyî ameyê kiştene. 

Sayano Şovmen zirar dano şarê Agirî

Agirîyo ke bi heme probleman ciwîyeno, 4 serrî yo ke hetê Savci Sayan ê şovmenî ra yeno îdarekerdene. Agirî de betalîye zaf û halê kuçeyan qet baş nîyo. Her cay bajarî ra golê awe ameyê viraştene. Şaredarîya Agirî seba şarê xo çîyêk nêkena.

Agirî de ciwanî nêmendê

Hemserekê HDPyî yê Agirî Murat Ozurkî vat: ''Agirî de meseleya tewr girde betalîye ya. Seba ke gure çîn o, şarê ma verê xo dano teberê welatî. Hema heme tîya ciwanî nêmendê. Bi zanayîşî verê nê yeno akerdene. Îqtîdarê AKP-MHPyî polîtîkaya zextî û tengkerdişê warî rayra beno. Îqtîdar keno ke ciwanan ercanê ci ra raqilno, bifîno mîyanê gureyanê xiraban. Têna merkezê bajarî de nê Bazîd û Patnos de xebitnayîşê madeyê tîryakî zêdîyeno. Ma kenê ke ciwananê xo bipawê la xebetê ma çend serkewteyî  a zî babeta bîn a. Îqtîdar wazeno bi tesrnayîşî şarî bîgêro binê kontrolê xo. Şaredarîya AKPyî heme dezgehê îqtîdarî girewtî peyê xo û zirar dano şarê Agirî.''

Projeyanê ma yê seba tiryak û cinîyan qebul nêkenê

Hemsereka HDPyî ya Patnosî Muşerrefe Geçerî vat: '' Problemê tewr girdî xebitnayîşê tiryakî û kiştişê cinîyan o. Ma sey şaredarî na babete xebatê cîya cîya kerdî. Projeyê ma yê Şaredarîya Patnosî seba vernîgirewtişê xebitnayîşê tiryakî û kiştişî cinîyan, hete wezîfedaran ra ameyê redkerdene. Wazenê ma û şarî bîyarê hemverê yewbînan. La ma do xebatê xo dewam bikerê.''

 Şarê Bazîdî ameyo cezakerdene

Taha Kaya ke endamê Meclîsê Partî yê HDPyî yo û bi serran o Bazîd de sîyaset keno, ard vîrardene ke qeymeqamê Bazîdî bi xo vato; ‘‘Şima reya xo nêdanê AKPyî ma do berê sînorî nêakerê’’ Kayayî wina vat: ‘‘Şarê Bazîdî yeno cezakerdene, vanê ke eke şima reya xo bidê AKPyî ma di biverdê ke şar bazirganîye bikero. Her weçînitişî de berî yenê akerdene û dima yenê girewtene. Ciwananê ma bê çare û betal verdanê. Ciwanan dekenê torra tiryakî ke Îranî ra yeno. Gedeyî zî lîse de eşkenê peyda bikerê. Dewlete bi zanayîş destûr dana û teşwîq kena.’’