Wezîfedarê Hukmatî waşt ke hetkarîyî bi logoyê înan û bi logoyê Komela ÎHHyî bêrê erşawitene, coka dest na hetkarîyanê şaredarîye ser. Hemşaredara Panosî ya HDPyî Muşerref Geçer û Rayberê HDPyî yê Agirî Cemal Akarî ANFyî rê qisey kerd.

Geçere seba mexdûranê erdlerzî şîfa û serweşî waşt û vat, ‘‘Ma sey Şaredarîya Panosî dest bi kampanyaya hetkarî kerd û hema gama destpêkî de wesayîtê ma ameyê vindertene û dest na  hetkarîyanê ma ser. Ame vatene ke hetkarîyî tena bi raya AFADî yena kerdene

‘Paştîdayîşê komelkî ra aciz benê’

Geçere dîyar kerd ke çend ê bibê asteng zî înan xebatê xo kerdî û wina dewam kerd, ‘‘Ma zîyaretê ê keyeyan kerdî ke ameyê tîya. Destê ma ra çi bêro ma kenê. Hema vajê 20-25 keyeyê mexdûrî ameyê Panos. Ma bi kampanyaya komelkî hetkarîya şarê xo kenê. Ma şîyê Semsûr û paştîdayîşê komelkî dî. Ma ke şîyê ne walî ne zî şaredar uca de bî, ma 25 kesê tîmê hetkarî erşawitî. Xebata ma ya biorganîze ê aciz kerdî. Ma reyna sipasîya şarê xo kenê ke pastî danê yewbînan.’’

‘ÎHHyî dest na hetkarîyanê ma ser’

Rayberê HDPyî yê Agirî Cemal Akarî zî dîyar kerd ke hêzê dewlete û ÎHH hetkarîyanê înan rê bîyê asteng û dest na hetkarîyan ser û vat, ‘‘Embazanê ma yê welatperweran hetkarî erşawitêne û ma zî erşawitêne koordînasyonê xo rê û wina ma herêman ra vila kerdêne. Ma Agirî ra 15 tir hetkarîyî erşawitî. Embazê ma ke hetkarî ardêne ma rê, ê bi vatişê, ‘Şima çira ben HDPyî rê’ bîyêne asteng.’’