Erdlerzanê Bazarcix û Elbîstanî aşmêke xo dima verdaye. Fermdaranê YJA Starî ra Ferîde Alkan derheqê erdlerzê ke açarîya felakete û çîyê ke nê prosesî de ameyî qewimîyayene de ANFyî rê qisey kerd.

Ferîde Alkan vat: ''Dewlete wextanê winayênan de senî dişmenê merdim û komelî ya, senî merdiman bi dejan caverdana û kewena rantî dima dahîna zelal yeno vînayene. Wextanê winayênan de heme raştîye zelal benê. Îmtîhanê komelkîye yo. Dewlete wextanê winayênan de îmtîhanî vîne kena. Dewlete nê wextî de rîyê xo yê raştî ramojnena. Nê erdlerzî de zî wina bi.  Dewleta ke tim pê zûran yena wasifnayene, sey bimbareke yena ramojnayene bi heme raştîyan ameye vînayene. Dayîkan bi warkerdişê heseran vat 'dewlete ne merdeyanê ma rê kefen ne zî ganîyanê ma rê xeymî ardî.' Na raştîye zite her çî fînena çiman ver. Vatişê 'dewleta ke ma bacê xo da, leşkerîya xo kerde, mermûrîye û karkerîya xo kerde, ha ça?' sey pênasê raştî yê dewlete mezgê komelî de cayê xo girewt.

Herinda dewlete de komelo sîvîl vazda gazîya şarî. Dewlete verî hesabê kar-zirarê xo kerd û xora heta ke kewt dewre hinda zaf erey bi.  No zî yew fiset o ke şar xo dewlete ra bixelisno ke felaketa raşte bi xo ya. Hetê bînî ra bi seferberîya zerrîwazîye tewiro şorişgêr ê komelî zî ame vînayene.  Gerîlayî zî sey nê zerrîwazan ê ke erdlerz de vazdayî hetkarîya mexduranê erdlerzî. Gerlîlayî sey zerrîwazan semedê komel, şar û bi mîlyonan kesê ke binê zulmî de yê, xo kenê feda. Raşta zî di hewteyanê verênan ê nê erdlerzî de ma dî ke Kursîtan  û Tirkîya de bi des hezaran, se hezaran kesî senî bîyî şorişgêr.

Ma sey gerîlayan koyanê Kurdîstanî ra rîyê astengkerdişê dewlete tirke ra nêeşkayî vazdê hetkarîye bikerê la ma pê zerrîwazan zaf şa bîyî. Ma zaf eşkera dî ke ruhê Denîzan, felsefeya Rayber Apoyî komelê Kurdîstan û Tirkîya de hekîm o û yew hêzo şorişgêro zaf gird o. Xora komelêko bi des hezaran şorişgêr û gerîlayê ci est ê, tira çîyo wînayên yeno pawitene. Bi nê erdlerzî reyna muhîmîya paştîdayîşî ameye vînayene. Dimayê erdlerzî hendê dejan, hetkarî û paştîdayîş zî do vîrê şarî de bimano.

Wa bêro zanayene ke şorişgêrî bitaybetî gerîlayî tim wina sey zerrîwazîyan ê. No zengînîya zerrî ya û coka tim şa û bihûzûr ê. Binê çekanê kîmyewîyan, hêrişanê giranan de zî  hêvîya înan est a û gamanê pêtan erzenê. Wayîrê şar û komelê xo yo ke zor de yo, cinîya ke yena eciqnayene, ciwanîye; kulturo çîn hesibîyeno, ziwan; dara ke yena talankerdene, awe û teyr-tûran vejîyenê. Vera bêadaletîye, neheqîye, semedê dinyayêka edîle xo ra verêne û xo komelî rê kenê feda.

Gerîlatîye tim zerrîwazîye ya. Coka embazîye û hemrayîye ya gerîlayan hêzdar a. Senî ke zerrîwazan herêmanê erdlerzî de di hewteyî nan, kinc, şayî û çayê xo pare kerd ke do çirey nê xo vîra nêkerê, gerîlayî zî yew emir wina embaztîye kenê. Coka tekîlîya hemrayîye zaf muhîm a. No manevîyato hêzdar o. Gerîlayê ke sey arêtşa zerrîwazan semedê şarê xo ameyî têhet pênaskerdişo sade yê cuya raşte yo. Coka dostê her kesî û karkerê dewa yê. Coka adresê çareyê felaketa dewlete yê.''