Amed de Komeleya Cigêrayîş û Paştdayîşî ya 78an semedê tepişteyê nêweşan û tepişteyanê ke înfazê înan ameyî vêşnayene çalakîye organîze kerd. HDP, DBP û rêxistinê komelê sîvîlî zî tewrê çalakîye bîyî.

Hemserekê Komelaya 78an Huseyîn Barişî bale ante rewşa tepişteyanê nêweşan û tepişteyê ke rixmo ke înfazê înan bîyo temam nînê veradayene ser û vat: ''Zîndanan ra cenazayî vejîyenê. No ne huqûqî, ne merdimî û ne wijdanî yo. Ma nêwezanê hinî cenazayê domananê ma zîndanan ra vejîyê. Tepişteyê ke 30 serrî zîndan de mendî înfazê înan yenê vêşnayene. Çîyo winayên nîno qebulkerdene. Şima ceza daye, ceza yena temamkerdene la reyna şima tehlîye nêkenê. Sebebê nê çîyo?  Reyna tepişteyê nêweşî rixmê raporanê zîndan de nêeşkenê bimanê nînê veradayene. No înfazkerdişê merdiman o. Qet yew merdim û komel naye qebul nêkeno. Şima ciwan û domananê ma tepişenê bado ke extîyar benê veradanê.  La keye, merdim û tewr muhîm zî hêvîya înan esta.''