Şubeyê Amedî yê TUHAY-DERî derheqê îşkenceyê zîndananê Bunyan û Tekîrdagî de eşkerayîyêke daye. Eşkerayîye verê Baroyê Amedî de pê tewrbîyayîşê keyeyanê nobete ameye dayene.

Temsîlkarê HDP, DBP, TJA û xeylêk temsîlkarê partîyan û rêxistinan zî tewrê eşkerayîye bîyî. Bêrîtane Nergîs eşkerayîye wende û îfade kerd ke zîndananê Tekîrdagî de tepişteyî grevê vêşnîye de yê û waştişê tepişteyan nê yê: ''Wa caardişê keyfî û îşkence biqedê, qefesê têlînî bêrê wedaritene, odayî bêwaştiş nêrê vurnayene, peynîya îzolasyonî wa bêra ardene.''

Nergîse eşkera kerd ke Bunyan de zî tepişteyan rê payra hûmaritişî yeno ferzkerdene, tepişteyê nêweşî yenê derbkerdene. Nergîse vist vîrî ke tepişte Mehmet Hanefî Bîlgîn nê kerdişan ra zîndanê Bunyadî merd û ganî peynîya nê kerdişan bêra ardene.

Polîsan xîret kerd ke hêrişê eşkerayîye bikerê la Nergîse vera ney nêrazîbîyayîşê xo mojna. Nergîse pare kerd ke tecrîdê Îmraliyî vilayê pêro welatî bîyo. Nergîse venga her kesî da ke wa paştî bido çalakîya edaletî ya keyeyanê tepişteyan.