Kazim Ergun (Anter Dêrsim) o ke bi des seran sefanê Têgêrayîşê Azadîye yê Kurdîstanî de têkoşîn kerd Rojawan de 11ê teşrîna peyêne de netîceya krîzê qelbî de şehîd bi.

Anter Dêrsimî xeylêk wext Têgêrayîşê Azadîye de kede daye. Vakurê Kurdîstanî, metropolê Tirkîya, Ewropa, Mexmûr û tewr peynî de zî Rojawan de têkoşîno pîl da. Anter Dêrsimî gama ke Rojawan de têkoşîn kerdêne krîzê qelbî ravêrna û rixmê heme mudexaleyanê doktoran 11ê teşrîna peyêne de şehîd bi.

Anter Dêrsimî o ke 1969 de Dêrsim de ame dinya 1988 de Îstanbul de Têgêrayîşê Azadîye yê Kurdîstanî nas kerd û xizmetê pîlî dayê ci. Bado ke Akademîya Mahsum Korkmazî de perwerdeyo ke hetê Rayberê Şarê Kurdî Abdullah Ocalanî ra ame dayene temam kerd agêra Vakurê Kurdîstanî û tîya hetê dewleta tirke ra esîr ame girewtene. Wextêk zîndan de mend. Zîndan açarna mektebêk û xizmetê şorişî rê dewam kerd. Bado ke zîndanî ra vejîya têkoşînî rê dewam kerd. Netîceya zextê dewlete de mecbur mend şiro Ewropa û tîya zî karê xo rê dewam kerd. Rixmo ke zewijnaye û wayîrê di domanan bi xeylêk welatanê Ewropa de xebatî rayra berdî û rîyê xebetanê xo ra reyna kewt zîndan. Sey zîndananê Tirkîya zîndanê Ewropa de zî têkoşînê xo domna. Badê zîndanî bi hewayêkê qerardarî têkoşînê xo yê azadîye rayra berd. Wextêk şi koyanê Kurdîstanî uca ra ravêrt Kampa Rustem Cûdîyî  û xebatê rêxistinkerdişî kedî. Dima ra wextê xoverdayîşê Kobanê de şi Rojawan û xeylêk waran de têkoşîn kerd. Tewr peynî de tewrê xebatanê Partîya Yewîya Demokratîke (PYD)  bi. Semedê Şorişê Rojawanî her hele têkoşîn kerdêne.11ê teşrîna peyêne ya 2021î de netîceya krîzê qelbî de şehîd bi.

Şehîd Anter Dêrsim ewro do Qamişlo de bi merasîmêk bêro definkerdene.