Fermandaranê Qerargehê Merkezî yê HPGyî ra Hakî Armancî hêrişê îşxalî yê dewleta tirke yê vera Zap, Metîna û Avaşînî ANFyî rê ercnayî û rewşa peyenê ser o qisey kerd.

 Qiseykerdişê Fermandar Hakî Karerî ra beşêk wina yo:

''Artêşa tirke 14ê nîsane de dest pê hêrişê hewayî, 17ê nîsane de dest pê hêrişê erdî kerd û 25ê gulane de zî hêrişê vera xeta dewa Hekarî û Filehan kerd. Dewleta tirke şerê Ukrayna û Rûsya xo rê seba îşxalê Başûrî sey firsend dî û hêriş kerd. Seba ke weçînayîşî nêzdî benê îqtîdarê AKP-MHPyo ke qels beno wazeno nê şerî de ser bikewo û îqtîdarê xo rê dewam bikero. Operasyonê vera Başûr, Vakur û Rojawanê Kurdîstanî na çarçewe de yê.

Vera hêrişanê serê Zapî xoverdayîşêko pîl est o. Dişmen kewt tay tunelanê şerî la ancî zî Zap hema zî destê embazanê ma de yo. Dewleta tirke Zap de bi taybetî warê Kurojahroyî de bi giranî teng bîya. 24ê gulane de embazan vera dişmenî hêrişêko çetin kerd, tay çalakîyê hemwextî kerdî. Embazanê ma nînan de xeylêk leşkerê tirkî kiştî, dest na malzemeyanê leşkerîyan ser. Embazan heman roje Girê Cehenemî de hêrişê dişmenî kerd û uca de pêro dişmenî çin kerdî, dest na çek û malzemeyanê înan ser. Nê çalakîyan dişmen şikna.

Roja bîne 25ê gulane de dişmenî dewa Fileha û Girê Hekarî yê Zapî de operasyonêk da destpêkerdene. La dima ke înan derbê giranî werdî, waşt mesajê 'ma bi giranî aver şinê' bidê. Ma heta nika cewabê lazimî dayî nê operasyonan. Embazê ma xora her roje agahîyan danê ma. Kelecan û coşê embazan moral dano ma. Embazan cara hêrişê vera Fileha û Girê Hekarî pawitêne, amadekarîyî kerdêne. Yanî no operasyon dişmenî rê dafika ma bi. Dişmen wazeno cayê îşxalî hîra bikero la no mumkîn nîyo. Çunke embazê ma  her roje çalakîyan kenê, hêriş kenê. No zî dişmen keno gêj.

29ê gulane de Girê Hekarî de dişmenî waşt nêzdîyê Girê Şehîd Akîfî bibo. Embazê ma heta dişmen beno nêzdî pawenê û pê bombayan hêriş kenê. Dima embazê ma serkêşîya embaz Sîyabende Kobanê de şinê cenazayanê xeylêk kişteyan ser, çekanê înan gênê. Dişmenî waştêne Girê Hekarî de ca bido xo la apey rema. Dîmenê nê çalakîyan destê embazanê ma de yê û do biweşanîyê. 3-4 rojan ra dima dişmenî waşt reyna bêro la reyna derbe werde. 

12 rojî yo dişmen yeno verê tunelanê şerî, bombayan erzeno la pê nêeşkeno. Coka wazeno pê çeka kîmyewîye netîce bigêro. Girê Şehîd Zamanî de zî heman çi qewimîya, ê ameyî la dima reyna remayî. Nika rewşe senîn a? Ê verê tunelanê şerî de nîyê, xo nimnenê. La embazê ma tedbîranê xo gênê. Yanî şer nika wina yo. Nika şer wina yo; dişmen tunelan ra dûrî yo, dişmen wazeno pê bombayan bitesîr bibo la key bêro raştê embazan yeno û remeno. Girê Hekarî de înîsîyatîf destê embazan de yo. Uca de tîmê ma yê hereketînî çalakîyan kenê. Xora Skorsky tîya de amebi warardene.  Wa şarê ma bizano ke dişmen do uca de bişikîyo! Herême de Hemleya Şorişgêre ya Şehîd Savaş Meraşî yena kerdene.

25ê gulane de Girê Şehîd Mazlûmî de dişmen ame, ewnîya ke bêvengîye est a. Dima embazanê ma nişka ra hêrişê înan kerd û dişmen tarûmar kerd. Dişmen çend rojan nêeşka bêro xo ser. Çend rojan ra dima dişmenî waşt reyna bêro la embazanê ma vera ci çalakîye kerde, 5 îşxalkerî ceza kerdî. Dişmen verê embazanê ma de lerzeno mireno. Embazî tunelanê şerî de bi coşî şer kenê. Wexto ke yew gule teqeno her yew leşker remeno cayêkî. Yanî merdim meraq keno ke artêşa ke Zap de pêrîşan bîya, senî tira vejîyena.

Dişmen verî wazeno cayanê embazan tesbît bikero, bê cayan bido bombayan ver. Embazê ke şehîd bîyê zî bombardumananê winasênan de şehîd bîyî. Embazê ma bi gonîserdinîye nêzdîbîyayîşê dişmenî pawenê û danê piro. Girê Hekarî û dewa Filehan de kontrol destê embazan de yê. Dişmen nêeşkeno nê cayan de têbigêro. Dişmen bi panîkî têgêreno. Nika ê têna paştîya xo danê teknîkî, bombardumanan kenê. Xeta Girê Hekarî û dewa Fileha de şerêko çetin est o ke bala her kesî anceno. Dewleta tirke pêro îmkananê xo vera şerwananê kurdan şuxilnena. Hende bombardumanan kena ke hînî girî vînî bîyê. La wexto ke leşkeranê xo ana war, embazê ma danê piro. Wa şarê ma bizano ke şerwane azadîya Kurdîstanî û Rayberîye tewr vernî de xo ver danê, bi coş û kelecanîn ê.

Ganî şarê ma sey gerîlayan wezîfeyê xo bikero. Wa şarê ma bizano ke her çiqas nimnena vînîbîyayîşê dewlete pîl ê. Medyaya tirkan zî ney nimnena. Embazê ma şîyî hende cenazayan ser, nasnameyê kişteyan girewtî, dîmenê her çîyî girewtî. Yanî destê ma de her çi qeydkerde û belgekerde yê. Dişmen zî vano 'se beno wa bibo, cara ez do Zapî bigêra.' La do nêgêro! Şerwanê azadîye do rayîr nêdê dişmenî. Şima her yew gama xo de bineyna bin şorê! Wa şarê ma meraq mekero, amadekarîya ma pîl a û ma do hîna zaf surprîzan bikerê. Xoverdayîşê Zap, dewa Fileha û Metîna dewam keno.''